मस्यौदा तयार यायेगु जिम्मा शीर्ष नेतातय्त
मंकाः संकल्प प्रस्तावय् भाय् मिले यायेत गठित प्रमुख स्वंगू दलया नेता दुथ्याःगु कार्यदलं मस्यौदा तयार यायेगु जिम्मा शीर्ष नेतातय्त ब्यूगु दु । कार्यदलय् दुथ्याःगु स्वंगूलिं दलं थःथःगु अडान कायेवं कार्यदलं थुकीया जिम्मा शीर्ष नेतातय् ब्यूगु खः ।
शुक्रवाः सिंहदरवारय् जूगु कार्यदलया बैठकय् दुजःतय्सं सहमतिया विकल्प मदुगु धासें समस्याया निकास याकनं मालेत नं शीर्ष नेतातय् इनाप याःगु दु । मस्यौदा तयार यायेत माओवादी पाखें देव गुरुङ, कांग्रेस पाखें डा. रामशरण महत व एमाले पाखें युवराज ज्ञवाली दुगु कार्यसमिति गठन याःगु खः ।
कार्यसमितिं मस्यौदा तयार याये धुंकाः जक शीर्ष नेतातय् बैठक च्वनेगु ज्याझ्वः दुगु खःसां आः याकनं हे थुकीया बारे सहलह यायेत शीर्ष नेतातय् बैठक च्वनीगु खँ कार्यदलया दुजः युवराज ज्ञवालीं कनादिल ।
राष्ट्रपति प्रकरण नापं राजनीतिक गतिरोध अन्त्य यायेगु निंतिं मंकाः संकल्प प्रस्तावया मस्यौदा तयार यायेत गठित कार्यदलया बिहीवाःया बैठकय् गृहकार्य मगाःगु धासें शुक्रवाः तकया निंतिं स्थगित याःगु खः ।
