सूर्यविनायकय् खुल्ला चिडियाखाना दयेकेत सहलह
ख्वप (सन्ध्या टाइम्स)/ ख्वपया सूर्यविनायक जंगलयात खुल्ला चिडियाखाना दयेकेगु बारे जिल्ला वन कार्यालय ख्वपया ग्वसालय् छगू सहलह ज्याझ्वः जुल। उगु लागाय् याकनं हे दयेकेत्यंगु खुल्ला चिडियाखाना व मनोरञ्जन केन्द्र तयार यायेगु निंतिं राष्ट्रिय प्रकृति संरक्षण कोषया पदाधिकारी, सामुदायिक वन उपभोक्ता महासंघ, ख्वपया थीथी राजनीतिक दलया प्रतिनिधि, गाविस सचिव, वन उपभोक्ता समूह व पत्रकारतय् दथुइ अन्तर्क्रिया जूगु खः ।
ज्याझ्वलय् येँया जगडोल, गोकर्ण, चाल्नाखेल, यलया चापागाउँ, ख्वपया हे तेलकोट स्वयां नं सूर्यविनायक जंगल दकलय् उपयुक्त थाय् जूगुलिं थुगु हे लागाय् चिडियाखाना दयेकेत्यनागु खँ राष्ट्रिय प्रकृति संरक्षण कोषया निर्देशक शान्तराज ज्ञवालीं कनादिल। सामुदायिक वन उपभोक्ता महासंघया अध्यक्ष केदार खड्कां धाःसा उगु लागाय् मनोरञ्जन व खुल्ला चिडियाखाना दयेकेगु इलय् खुगू वन उपभोक्ता समूहयात प्रत्यक्ष लिच्वः लाइगुलिं उमिगु हक कुण्ठित याये मजिउ धयादिल ।
नेमकिपा ख्वप जिल्लाया अध्यक्ष रमेश थापा श्रेष्ठं चिडियाखाना ख्वपयात म्हसीकेत व ख्वपया पर्यटन विकास यायेत ग्वाहालि जुइगुलिं योजना पूवंकेत पार्टीपाखें माःगु ग्वाहालि जुइगु खँ कनादिल। जिविस ख्वपया सभापति प्रभा पाण्डेया सभापतित्वय् जूगु ज्याझ्वलय् माओवादीया कृष्णलाल गोजाश्रेष्ठ, नेपाली कांग्रेसया रामेश्वर ढुंगेल, एमालेया सन्तोष ढुंगेलपिंसं नं ग्वाहालिया यायेगु बचं बियादिल ।
