नीन्यादँ लिपा पशुपतिइ जलप्याखं
येँ (सन्ध्या टाइम्स)/नेपाःया हे दकलय् पुलांगु द्यःप्याखं धयातःगु जल देय् (हरिसिद्धि) या प्याखं आः ग्वल देशय् (पशुपति लागाय्) हयाः हुइकीगु जूगु दु। थ्वहे वइगु पुस ३० गतेनिसें ग्वलया जयबागेश्वरीइ उगु प्याखं हुइकेगु लागिं तयारी शुरु जुइधुंकूगु दु ।
उगु जलप्याखं झिंनिदँय् छक्वः ग्वलय् हयाः हुइकेगु चलन दुगु खः। अथे खःसां ग्वलय् हयाः थ्व प्याखं महुइकूगु धाःसा नीन्यादँ दयेधुंकल। थुगुसी स्थानीय ल्याय्म्हतय् सक्रियताय् छगू विशेष पुचः हे दयेकाः जलप्याखं ग्वलय् हयेगु कुतः जूगु खः ।
ग्वलय् जलप्याखं हुइकेगु ज्या तसकं खर्चालु जूगुलिं उकिया व्यवस्थापन यायेत थाकुगु खँ ग्वसाः खलकं धाःगु दु। परम्पराकथं थ्व प्याखं ग्वलय् जक लगातार स्वला तक हुइकेमाःगु खः। उकिया लागिं करिब ४० लाख तका दां मालीगु ल्याःचाः पिहां वःगु दु। तर ग्वलया ग्वसाः खलकं म्हो जक खर्च याःसां गाइगु कथं प्याखंयात चीहाकः यानाः लछि निलां क्वचायेकेगु लागिं प्याखं पुचःयात इनाप यानाच्वंगु खँ धाःगु दु ।
थुकी खास यानाः प्याखं हुलीपिं द्यःगंछिंयात वसः, भ्वय्, बलि आदि ज्याय् खर्च जुइगु खः ।
जलप्याखं हुइके हइबलय् ग्वलय् दँय्दसं हइगु नवदुर्गाया प्याखं धाःसा हइ मखु। थुगुसी जलप्याखं वइगु जूगुलिं नवदुर्गा प्याखं हये मतेनि धकाः ख्वपय् पौ नं छ्वयेधुंकूगु दु।
नीन्यादँ लिपा प्याखं हुइके हयेधुंकाः वयां लिपा १२-१२ दँय् हे चलन कथं प्याखं पिकायेगु बारे बिचाः यायेगु खँ नं ग्वसाः खलकं धाःगु दु ।
तसकं पुलांगु थुगु जल प्याखनय् खास यानाः रामायण, महाभारतया बाखंत माःहनाः क्यनीगु खः। थ्व प्याखं २५०० दँ पुलां धइगु अनुमान दु ।
