पं. निष्ठानन्दया १५३ दँ बुदिं
येँ (सन्ध्या टाइम्स)/ गद्यगुरु निष्ठानन्द वज्राचार्यया १५३ दँ बुदिं थौं हन। ओलम्पस क्लब व निष्ठानन्द स्मृति गुथिया मंकाः ग्वसालय् जूगु उगु ज्याझ्वलय् साहित्यकार हितकरवीर सिंह कंसकार, ज्याझ्वःया कजि प्राध्यापक सुवर्ण शाक्य व पुलांम्ह मन्त्री प्रयागराज सिंह सुवालपिंसं गद्य गुरु निष्ठानन्दया झ्वाताय् स्वां देछानादीगु खः। कजि शाक्यं लसकुस यासें न्ह्याःगु उगु ज्याझ्वलय् साहित्यकार हितकरवीरसिंह कंसकारं नुगःखँ प्वंकादीगु खः ।
अथे हे नेपालभाषा केन्द्रीय विभाग व लुमन्ति दबूया ग्वसालय् थौं सुथय् यलय् नं निष्ठानन्द बुदिं न्यायेकल।
पं. निष्ठानन्दया किपाय् स्वां देछासें न्ह्याःगु उगु ज्याझ्वलय् नेपालभाषा केन्द्रीय विभागया प्रमुख प्रेमशान्ति तुलाधर, पाहां हेराकाजी महर्जनपिंसं निष्ठानन्दया जीवनी व कृतित्व बारे कुलादीगु खः ।
लुमन्ति दबूया नायः मोहनकृष्ण श्रेष्ठया सभापतित्वय् न्ह्याःगु उगु ज्याझ्वलय् सुलोचना जोशी, अमिरमैयाँ रञ्जित, विमलप्रभा वज्राचार्य, दिव्य ताम्राकार, प्रेमरत्न वज्राचार्य, उमेश महर्जन, अष्टमान महर्जन, प्रकाश शाक्य, लव जोशी व इश्वरी मैयाँ श्रेष्ठपिंसं थःपि रचना पाठ यानादीगु खः ।
