प्रम व प्रचण्ड मध्यमार्गी लँपू मलेत सहमत
राजनीतिक गतिरोधया निकास व बजेट पारित यायेगु विषयलय् प्रधानमन्त्री माधवकुमार नेपाल व एनेकपा (माओवादी)या अध्यक्ष पुष्पकमल दाहाल 'प्रचण्ड' दथुइ सहलह जूगु दु । निम्ह नेतात राष्ट्रपतिया पलाःया बारे मध्यमागी लँपू पाखें सहमति मालेत सहमति जूगु दु ।
प्रधानमन्त्री नेपालया निजी निवास कोटेश्वरय् शुक्रवाः सुथय् जूगु खँल्हाबंलां छुं ठोस निष्कर्ष पिकाये मफुसां राष्ट्रपतिया पलाःया बारे मध्यमार्गी लँपू पाखें सहमति मालेगु सहमति जूगु खः । बैठकय् प्रधानमन्त्री नेपालं बजेट पास मजुयाः देया आर्थीक अवस्था धरासायी जुइगु अवस्था वःगु धयादिसें बजेट पारित यायेत इनाप यानादीगु खः । माओवादी अध्यक्ष प्रचण्डं धाःसा दक्वं समस्याया समाधान प्याकेजय् मालेमाःगु खँय् बः बियादिल ।
बैठक लिपाः माओवादी अध्यक्ष प्रचण्डं प्रधानमन्त्री नेपालं बजेट पास यायेत ग्वाहालि यायेत इनाप याःगु कनादिसें थुकीया बारे माओवादीया कन्द्रीय समितिया बैठक लिपाः जक धारण सार्वजनिक यायेगु धयादिल ।
अथेहे निम्ह नेतात दथुइया खँल्हाबंला लिपाः प्रधानमन्त्री नेपालं बजेटया विषयलय् सहलह जूगु व सहलह सकारात्मक जूगु कनादिल । नापं वयेकलं राष्ट्रपतिया पलाःया बारे मध्यमार्गी लँपू पाखें न्ह्या वनेगु सहमति जूगु धयादिल । गज्याःगु मध्यमार्गी लँपू धाइगु खँ धाःसा वयेकलं स्पष्ट यानामदी ।
