माओवादी व तमलोपा दथुइ सहलह
सत्ता साझेदार तराई मधेश लोकतान्त्रिक पार्टी व प्रमुख प्रतिपक्षी एनेकपा (माओवादी) दथुइ समसामयिक विषयलय् सहलह जूगु दु ।
बिहीवाः तमलोपाया संसदीय दलया ज्याकूथी जूगु खँल्हाबंलाय् माओवादीं राजनीतकि गतिरोध अन्त्यया निंतिं तटस्थ व प्रभावकारी भूमिका म्हितेत तमलोपायात इनाप याःगु खः । तमलोपां राजनीतिक सहमति व संवाद पाखें हे बजेट पारित जुइमाःगु खँ तःगु खः ।
तमलोपाया नेता हृदयश त्रिपाठीं राजनीतिक सहमति व संवाद पाखें हे दक्वं समस्या समाधान यायेगु खँ बैठकय् तयाःगु कनादिल । वयेकलं विकल्प मालाः मखु संसदय् बजेट न्ह्यब्वयेगु ज्या जुइधुंगु व सदन जिवित हे दुगुलिं सहमति पाखें हे बजेट पारित जुइमाःगु थःगु पार्टीया धारणा जूगु कनादिल ।
निगू दल दथुइ राजनीतिक निकासया निंतिं संवाद व सहमति पाखें हे मध्यमार्गी लँपू माला: निकास मालेगु बारे सहलह जूगु खः । बैठकय् माओवादी पाखें निम्ह उपाध्यक्षत डा. बाबुराम भट्टराई व नारायणकाजी श्रेष्ठ 'प्रकाश' व तमलोपाया पाखें अध्यक्ष महन्त ठाकुर, उपाध्यक्ष हृदयश त्रिपाठी व प्रवक्ता सर्वेन्द्रनाथ शुक्लाया ब्वति दुगु खः ।
