ओली दिल्ली पाखे

भारतीय कम्युनिष्ट पार्टी मार्क्सवादीया ग्वसालय् जुइत्यंगु अन्तराष्ट्रिय कम्युनिष्ट सम्मेलनय् ब्वति कायेत नेकपा एमालेया स्थायी कमिटी दुजः नापं विदेश विभाग प्रमुख केपी शर्मा ओलीं बिहीवाः न्हिनय् दिल्ली झायादीगु दु ।

दिल्ली प्रस्थान याये न्ह्यः त्रिभुवन अन्तराष्ट्रिय विमानस्थलय् पत्रकारत नाप खँल्हाबंला यानादिसें वयेकलं भारत भ्रमणया झ्वलय् भारतीय नेतात नाप खँल्हाबंला यायेगु ज्याझ्वः मदुसां सम्भावना अप्वः जूगु धयादिल ।

माओवादी अध्यक्ष पुष्पकमल दाहाल 'प्रचण्ड' सिंगापुर भ्रमण लिपाः वर्तमान सरकार याकनं हे क्वदलीगु खँ धयादीगु छुं दिं लिपा हे जूगु ओलीया भारत भ्रमणयात राजनीतिक ख्यलय् अर्थपूर्ण रुपं काःगु दु । वयेक थःगु भारत भ्रमण क्वचायेकाः शनिवाः नेपाः लिहांझायादी ।