थुगु दँया हे दकलय् म्हो कारोबार
येँ (सन्ध्या टाइम्स)/नेपाल स्टक एक्सचेन्जय् म्हिगः छुं दँ थुखेया हे दकलय् म्हो कारोबार जूगु दु। वंगु आर्थिक दँय् झिगू करोड तका स्वयां अप्वः कारोबार जुयाच्वंगु शेयर बजारय् म्हिगः स्वंगू करोड तका नं कारोबार मजुल। म्हिगःया कारोबारय् हाकनं छक्वः कारोबार शुरु जुइवं कुहां वंगु नेप्से अन्त तकं कायम जुल। छन्हु न्ह्यः कारोबार कम्पनी, दां, शेयर कारोबार दक्वं थहां वंगु खःसा म्हिगः उकिया पाय्छि अःखः दक्वं हे कुहां वंगु दु ।
स्टक एक्सचेन्जया कथं म्हिगः नं कारोबार जूगु दक्वं समुहया परिसुचक कुहां वंगु दु। शेयर बजारय् कुहां वयाच्वंगु र्हासया कारणं म्हिगः नेप्से २ दशमलव ७६ अंकं कुहां वयाः ५६२ दशमलव २२ अंकय् थ्यंगु दु। सेन्सेटिभ नं शुन्य दशलमव ११ अंकं कुहां वःगु दुसा फ्लोट शुन्य दशमलव शुन्य ७ अंकं कुहां वल ।
कारोबार जूगु उपसुचकय् नेप्से थहां कुहां जुइगुली प्रमुख भूमिका म्हितीगु वाणिज्य व विकास बैंक समुहया कारोबार वःगु र्हास हे नेप्से कुहां वःगु कारण जुल। वाणिज्य बैंक समुह शुन्य दशमलव २८ अंकं कुहां वयाः ५४१ दशमलव १८ अंकय् थ्यन। विकास बैंक समुहया सुचक नं २ दशमलव ४७ अंकं कुहां वयेवं ६२३ दशमलव शुन्य २ अंकय् थ्यंगु दु। अथे हे कुहां वःगु मेगु उपसुचकय् अन्य समुह दकलय् अप्वः १४ दशमलव शुन्य ९ अंकं कुहां वयाः ५९३ दशमलव ३४ अंकय् थ्यंगु दु ।
मेखे म्हिगःया कारोबारय् फाइनान्स समुह छगू जक शुन्य दशमलव २ अंकं थहां वनाः ५९९ दशमलव ६३ अंकय् थ्यंगु दु। वीमा समुहपाखे कारोबार जूसां छुं हिउपाः वःगु मदुसा उखे जलविद्युत समुहया धाःसा कारोबार मजुल ।
न्यय्निगू कम्पनीया न्यय्खुद्वः व खुसः व पीन्यागू कित्ता शेयर न्याये-मी जुयाः निगू करोड चय्निगू लाख ग्वीखुद्वः तका दांया कारोबार जुल। दांया ल्याखं थ्व वंगु दँया तुलनाय् आः तकया हे दकलय् म्हो कारोबार खः। छन्हु न्ह्यः शेयर बजारय् निगू लाख न्हय्द्वः व गुसः व झिंनिगू कित्ता शेयर न्याये-मी जुयाः न्हय्गू करोड नीन्हय्गू लाख नीस्वद्वः तका दांया कारोबार जूगु खः ।
कारोबार याःगु कम्पनीमध्ये स्टायण्डर्ड चार्टर्ड बैंक दकलय् अप्वः पीन्यागू लाख ख्वीन्हय्द्वः तका दांया कारोबार याःगु दु। म्हिगः नं जनरल फाइनान्सं अप्वः कमे याःगु दुसा छिमेक विकास बैंकं दकलय् अप्वः द्यापं फयेमाःगु दु।
निसः तक शेयर कारोबार याःगु भिवोर विकास बैंकया १०,०६० कित्ता शेयर न्याये-मी जुल ।
