अनमिन बारे सरकारया धापू छु ?
येँ (सन्ध्या टाइम्स)/अनमिन बारे सरकारया स्पष्ट धापू छु खः? अनमिन प्रमुख करिना लेनग्रीनं थौं प्रधानमन्त्री माधव नेपालयाके थुकिया लिसः फ्वनादीगु दु ।
थौं सुथय् वालुवाटारय् प्रमयात नापलासें लेनग्रीनं उगु माग यानादीगु खः ।
मय्जु लेनग्रीनं सरकारय् दुथ्याःपिं मन्त्रीतपाखें हे शान्ति प्रक्रियाया विरोधय् अभिव्यक्ति वयाच्वंगु व आः नकतिनि राष्ट्र संघया टिप्पणीयात कयाः नेपाः सरकारं कडा प्रतिक्रिया बिउगु सन्दर्भय् लेनग्रीनं थ्व न्ह्यसः तयादीगु खः ।
लिसलय् प्रम नेपालं मन्त्रीतय् अभिव्यक्ति व्यक्तिगत खः धासें सरकार सेना समायोजन यानाः शान्ति प्रक्रियायात पूर्णता बीत तयार दु धयादिल ।
लिसें वय्कलं अनमिनं निष्पक्ष भूमिका म्हिताः शान्ति प्रक्रियाय् ग्वाहालि यायेत नं इनाप यानादिल ।
लेनग्रीनं माओवादी सेनाया पुनःस्थापना व समायोजन प्रक्रियायात तिव्रता बीत इनाप यानादिल। वय्कलं शान्ति प्रक्रिया अवरुद्ध जुइ फइगुपाखे नं प्रमयात सचेत याकादिल।
लिपांगु इलय् वयाः सरकार व अनमिनया स्वापू ख्वाउँया वनाच्वंगु दुसा प्रम नेपालं लेनग्रीनयात तःन्हु तक नापलायेगु ई तकं मबिउगु खः ।
