संकल्प प्रस्तावय् अझं सहलह
येँ (सन्ध्या टाइम्स)/राजनीतिक गतिरोध चीकेगु निंतिं मंकाः संकल्प प्रस्ताव तयार यायेत स्वनातःगु कार्य दलया बैठक थौं च्वनेत्यंगु दु ।
कार्यदलं तयार याःगु मंकाः संकल्प प्रस्तावयात थौं च्वनीगु स्वंगू दलया शीर्ष नेतातय् बैठक पेश यानाः अन्तिम रुप बीगु खँ धाःगु दु ।
कार्यदलं तयार यानातःगु खाकायात स्वंगू दलया शीर्ष नेतातय् बैठकं अन्तिम रुप बीगु जुइ ।
कार्यदलं न्हापा नं मंकाः संकल्प प्रस्ताव तयार यायेधुंकूगु खःसां लिपा माओवादीं उकी असहमति क्यनेवं प्रस्ताव अथें लाःवंगु खः। यदि प्रस्तावया भाषा मिले यानाः थुकी सहमत जुल धाःसा समस्या ज्यनीगु आशा यानातःगु दु।
कार्यदलय् माओवादीपाखें देव गुरुङ, एमालेपाखें युवराज ज्ञवाली व कांग्रेसपाखें अर्जुन नरसिंह केसी दुथ्याः। तर थौं पारिवारिक कारणं कार्यदलय् केसीया पलेसा पुलांम्ह गृहमन्त्री कृष्णप्रसाद सिटौंलां ब्वति काइगु खँ धाःगु दु ।
