राष्ट्रपति सम्बन्धी माओवादी अडान यथावत
येँ (सन्ध्या टाइम्स)/राष्ट्रपतिं ल्ह्वंगु पलाःया विरुद्ध थःपिंसं कया वयाच्वनागु अडान मत्वःतेगु निर्णय माओवादीं याःगु दु
।
थौं सुथय् माओवादी अध्यक्ष पुष्पकमल दाहाल 'प्रचण्ड' निवास खुसिबुँइ जूगु माओवादी केन्द्रीय समितिया बैठकं उगु निर्णय याःगु खँ माओवादी उपाध्यक्ष नारायणकाजी श्रेष्ठ (प्रकाशं) पत्रकारतय्त कनादिल ।
बैठकं माओवादीया मागयात कयाः दलतय् दथुइ कन्हय् तक सहमति जुइ फइगु निष्कर्ष पिकाःगु खँ नं कँसें वय्कलं अथे जूगुलिं तत्काल स्वंगूगु चरणया आन्दोलन घोषणा मयायेगु निर्णय जूगु जानकारी नं बियादिल ।
बैठकय् सिंगापुरय् वासः याकाच्वंम्ह नेपाली कांग्रेसया सभापति गिरिजाप्रसाद कोइरालालिसे जूगु सहमति बारे अध्यक्ष प्रचण्डं ब्रिफिङ यानादीगु खः ।
बैठकय् सहमति कायम यायेगु निंतिं थःपिंसं न्हापा स्वयां अप्वः लचकता नालेगु निर्णय याःगु खँ नं वय्कलं कनादिल।
थौं च्वनीगु धयातःगु स्वंगू दलया शीर्ष नेतातय् बैठकय् पार्टीपाखें नालेगु रणनीति बारे नं थौं च्वंगु बैठकय् सहलह जूगु खः ।
माओवादीं कन्हय् तक सहमति कायम मजुल धाःसा स्वंगूगु चरणया आन्दोलन घोषणा यायेगु निर्णय यानातःगु खः ।
