'शुल्क थमकाःसा त्रिविवि बन्द जुइ'
येँ (सन्ध्या टाइम्स)/त्रिविविया रजिष्ट्रार सूर्यलाल अमात्यं यदि थ्व इलय् त्रिविविं थःपिनि शुल्क थमकायेगु खःसा त्रिविवि हे सञ्चालन याये फइ मखु धयादीगु दु। म्हिगः त्रिविविया शुल्क वृद्धियात कयाः जूगु छगू ज्याझ्वलय् न्ववासें वय्कलं थ्व खँ धयादीगु खः ।
त्रिविविं झिंच्यादँ लिपा वयाः बल्ल शुल्क थकायेत्यंगु खः धासें वय्कलं थ्व त्रिविविया बाध्यता खः व थथे मयात धाःसा आः त्रिविवि न्ह्यःने न्ह्याः वने फइ मखु धयादिल ।
ज्याझ्वलय् न्ववासें नेवि संघया अध्यक्ष प्रदिप पौडेलं विद्यार्थीतय्त वास्ता तक हे मयासे, छबचं हे मन्यँसे शुल्क वृद्धि याःगुलिं थःपिंसं आन्दोलन यानाः हे थ्व वृद्धि पनेगु ख्याच्वः बियादिल ।
एमाले समर्थित अखिलया अध्यक्ष रामकुमारी झाँक्रीं धाःसा यदि वृद्धि हे यायेमाःगु खःसां फुकलिसे सहमति दयेकाः जक याःगु जूसा बांलाइगु सुझाव बियादिल ।
त्रिविविपाखें थुगुसी आकाझाकां थःपिनि शुल्कय् अत्यधिक वृद्धि याःगुलिं उकिया विरुद्ध सत्तारुढ पार्टीया विद्यार्थी संगठनत हे सतकय् कुहां वयाच्वंगु दु। विद्यार्थी संगठनतय्सं थुकिया विरुद्ध बिस्कं मोर्चा दयेकाः सतक आन्दोलन शुरु यायेधुंकूगु दु। विद्यार्थी आन्दोलन लिपा त्रिविविं आन्दोलनरत पुचःतय्त सःताः वार्ता याःसां विद्यार्थीतय्सं शुल्क वृद्धि क्वकाये हे माः धकाः दवाव बियाच्वंगु खँ सीदुगु दु ।
