कार्यदल पाखें मंकाः प्रस्ताव तयार यायेमफुत
शीर्ष नेतातय् बैठक स्थगित
मंकाः प्रस्ताव तयार यायेत स्वंगू दलया नेतात दुथ्याका गठित कार्यदलया बैठक बिना निष्कर्ष क्वचाःगु दु । बिहीवाः च्वंगु उगु कार्यदलया बैठकय् गृहकार्यया अभाव जूगु धासें शुक्रवाः तकया निंतिं स्थगित या:गु दु । कार्यदलया मेगू बैठक शुक्रवाः सुथय् च्याता: ईलय् हानं च्वनीगु जूगु दु ।
एकीकृत नेकपा (माओवादी)या देव गुरुङ, नेपाली कांग्रेसया डा. रामशरण महत व नेकपा (एमाले)या युवराज ज्ञवाली दुथ्याःगु कार्यदलं थौं स्वंगू दलया शीर्ष नेतातय् बैठकय् मंकाः प्रस्ताव न्ह्यब्वइगु ज्याझ्वः दुगु खः । कार्यदलं उगु मंकाः प्रस्ताव तयार यायेमफेवं शीर्ष नेतातय् बैठक नं स्थगित जूगु दु ।
बुधवाः च्वंगु स्वंगू दलया शीर्ष नेतातय् बैठकं थौं न्हिनय् तकया दुने मंकाः प्रस्ताव तयार यानाः शीर्ष नेतातय् बैठकय् न्ह्यब्वयेगु जिम्मा उगु कार्यदलयात ब्यूगु खः । कार्यदलया थौंया बैठकय् कांग्रेस नेता डा. महत पारिवारिक कारणं उपस्थित मजुइवं वयेकया थासय् मेम्ह कांग्रेस नेता कृष्णप्रसाद सिटौलां बैठकय् ब्वति कायादीगु खः ।
