'दक्वं समस्याया समाधान छक्वलं मालेमाः'
एकीकृत नेकपा (माओवादीं) बजेट पास याकेगु जक मखसें दक्वं राजनीतिक गतिरोधया समाधान छक्वलं मालेमाःगु खँय् बः ब्यूगु दु ।
माओवादी अध्यक्ष पुष्पकमल दाहाल 'प्रचण्ड'या न्हू बजारय् च्वंगु छेँय् बिहीवाः सुथय् पार्टीया पदाधिकारीतय् बैठकं दक्वं समस्याया समाधान प्याकेजय् हे मालेमाःगु निर्णय याःगु खः । अथेहे बैठकं स्वंगू प्रमुख दलतय् बैठकय् सरकारया नेतृत्वया सम्बन्धय् नं सहलह यायेगु निर्णय याःगु दु । बैठकं बजेट पारित, सरकार व राष्ट्रपतिया पलाःया बारे छक्वलं समाधान मालेमाःगु खँ क्वछीउगु खः ।
माओवादी उपाध्यक्ष नारायणकाजी श्रेष्ठ 'प्रकाशं' बैठकं मेमेगू दलतय्सं सहमतिया निंतिं लचकता क्यंगु निष्कर्ष पिकाःगु कनादिसें प्याकेजय् सहमति जुइगु धयादिल । तर बैठकं थःपिनिसं सरकारयात ब्यूगु अल्टिमेटम दुने सहमति जुइमाफुसाः आन्दोलन यायेगु निर्णय याःगु दु ।
अथेहे बैठकय् अध्यक्ष प्रचण्डं थःगु सिंगापुर भ्रमण व कांग्रेस सभापति गिरिजाप्रसाद कोइराला नाप जूगु खँल्हाबंलाया बारे पार्टी पदाधिकारीतय्त जानकारी बियादीगु खः ।
