प्रम व अनमिन प्रमुख दथुइ खँल्हाबंला
प्रधानमन्त्री माधवकुमार नेपाल व राष्ट्रसंघीय नियोग अनमिनया प्रमुख करिन ल्यानग्रेन दथुइ बिहीवाः सुथय् खँल्हाबंला जूगु दु । प्रधानमन्त्री निवासय् जूगु खँल्हाबंलाय् नेपाःया शान्ति प्रकृया, संविधान निर्माण, अनमिनया कार्यवधी लगायत विषलय् सहलह जूगु खः ।
खँल्हाबंलाय् प्रधानमन्त्री नेपालं नेपाः सम्बन्धी विवादास्पद राष्ट्रसंघीय प्रतिवेदनया विषयलय् च्यूताः प्वंकादीगु खः । वयेकलं छुं नं स्वतन्त्र संस्थां नेपाःया संवेदनशीलतायात थुइका अभिव्यक्ति बिमाःगु खँ धयादीगु खः । अनमिन प्रमखु ल्यानग्रेनं धाःसा नेपाःया आन्तरिक मामिलाय् हस्तक्षेप यायेगु राष्ट्रसंघया छुं मनसाय मदुगु धयादिल ।
वंगु अक्टोबरय् राष्ट्रसंघया महासचिव बान की मुनं सुरक्षा परिषदया बैठकय् न्ह्यब्वयादीगु नेपाः सम्बन्धी प्रतिवेदनय् मंकाः सरकार निर्माण जुइमाःगु खँय् बः बियादीगु खः । उगु अभिव्यक्तियात सत्ता साझेदार दलतय्सं नेपाःया आन्तरिक मामिलाय् हस्तक्षेप जूगु धासें आपत्ति प्वंकूगु खः ।
अथेहे ल्यानग्रेनं नेपाःया शान्ति प्रकृया जटिल अवस्थाय् दुगुलिं सहमतिया माध्यमं न्ह्यावनेत प्रम नेपालयात सुझाव बियादिल । नापं वयेकलं दलत दथुइ जारी राजनीतिक गतिरोध समाधान यायेत जुयाच्वंगु कुतः प्रति प्रशन्नता प्वंकादिल ।
