राज्यमन्त्री बेगमयात कारवाही यायेत निन्हुया अल्टिमेटम

कर्मचारीतय्सं पर्साया प्रमुख जिल्ला अधिकारीयात हातपात याम्ह कृषि राज्यमन्त्री करिमा बेगमयात कारवाही यायेत निन्हुया अल्टिमेटम ब्यूगु दु । नेपाल राष्ट्रिय कर्मचारी महासंघं शुक्रवाः तक नं कारवाही मयासाः आइतवाः निसें प्रशासनिक ज्याखँ ठप्प यायेगु कथं आन्दोलन यायेगु ख्याच्वः ब्यूगु दु ।

महासंघया अध्यक्ष रुक्म लामिछानें बिहीवाः येँ जूगु छगू ज्याझ्वःलय् न्ववानादिसें राज्यमन्त्री बेगनयात कारवाही मयासाः आन्दोलन यायेगु व अज्याःगु आन्दोलनं थ्व सरकार नं क्वदलीगु ख्याच्वः बियादिल ।

अथेहे नेपाल निजामति कर्मचारी संगठनया महासचिव पुण्य ढकालं कारवाही मजुसाः राज्यमन्त्री बेगमयात राजीनामा बीत बाध्य याकीगु धयादिल । राष्ट्रिय स्वतन्त्र कर्मचारी मिलन केन्द्रया अध्यक्ष कृष्ण भण्डारीं कारवाही मजुसाः आन्दोलन यायेगुया विकल्प मदुगु धयादिल ।