कोइरालायात वासः याकेत २ करोड ग्वाहालि
सरकारं नेपाली कांग्रेसया सभापति नापं पुलाम्ह प्रधानमन्त्री गिरिजाप्रसाद कोइरालायात सिंगापुरय् वासः याकेत निगू २ करोड आर्थिक ग्वाहालि याःगु दु ।
बुधवाः बहनी च्वंगु मन्त्रिपरिषदया बैठकं कोइरालाया वासः याकेत लगेजुइगु दक्वं खर्च पुलेगु निर्णण यासें आःयात पेश्की स्वरुप २ करोड तका ब्यूगु खः । कोइरालायात हिलय् अक्सिजनया मात्रा म्हो जुयाः सहिद गंगाला हृदय केन्द्रय् भर्ना याःगु खःसा लिपाः थप वासः यायेत एअर एम्बुलेन्स पाखें सिंगापुर यंकूगु खः ।
अथेहे बैठकं मोदनाथ प्रश्रितया संयोजकत्वय् सहिदया गज्याःपिंत धायेगु धइगु आधार तय यायेत समिति गठन याःगु दु । सरकारं भु-उपयोग परिषद् गठन यायेगु निर्णय नं याःगु दु ।
मन्त्रिपरिषदं टिम्बर कर्पोरेसनया अध्यक्षय् भरतबहादुर चन्द व महासचिवय् दीपक उपाध्याययात नियुक्त याःगु दु । नापं राष्ट्रिय अनुसन्धान विभागया निर्देशकय् ऐनवीरजंग राणायात बढुवा याःगु दु ।
