सहमति मालेगु जिम्मा कार्यदलयात
प्रमुख स्वंगू दलत एनेकपा (माओवादी), नेपाली कांग्रेस व नेकपा (एमाले)या नेतातय् बैठकं राजनीतिक गतिरोध अन्त्य व बजेट पारितया निंतिं सहमति यायेत न्हापा गठन याःगु कार्यदलयात जिम्मा ब्यूगु दु ।
गतिरोध अन्त्यया निंतिं बुधवाः च्वंगु स्वंगु दलया बैठकं माओवादीया देब गुरुङ, कांग्रेसया अर्जुननरिसंह केसी व एमालेया युवराज ज्ञवाली दुथ्याःगु कार्यदलयात न्हापा तयार याःगु मंकाः संकल्प प्रस्तावयात दक्वसितं मान्य जुइकथं मिले यायेगु जिम्मा ब्यूगु दु ।
थ्वस्वयां न्ह्यः राष्ट्रपतिया पलाःया बारे मंकाः संकल्प प्रस्तावया मस्यौदा तयार यायेत स्वम्ह दुजः दुगु उगु कार्यदल गठन याःगु खः । माओवादी उपाध्यक्ष नारायणकाजी श्रेष्ठं 'प्रकाशं' थौंया बैठकं गठन याःगु कार्यदलं बिहीवाः जुइगु उच्चस्तरिय बैठकय् सहमतिया प्रस्ताव पेश याइगु कनादिल ।
बैठकय् माओवादीं संसदय् यानाच्वंगु अवरुद्धया कारणं बजेट पास यायेमफुगु व राजनीतिक गतिरोधया कारणं संविधान निर्माण प्रकृयाय् हे अवरोध खनेदुगु विषयलय् सहलह जूगु खः । बैठकय् कांग्रेसं न्हापा बजेट पास जुइमाःगु अले तिनि मेमेगू राजनीतिक सहमति मालेमाःगु खँ तःगु खःसा उकीयात माओवादीं अस्वीकार याःगु खः । माओवादीं धाःसा दक्वं विषयया समाधान प्याकेजय् मालेमाःगु अडान काःगु खः ।
बैठकं स्वंगू दलय शीर्ष नेतातय् बैठक बिहीवाः न्हिनय् निताः ईलय् च्वनेगु निर्णय याःगु दु ।
