राजनीतिक सहमति लिपाः जक सेना समायोजन यायेत सुझाव

एकीकृत नेकपा (माओवादीं) उच्च नेतृत्व तहलय् सहमति कायम यानाः जक सेना समायोजन प्रकृया न्ह्याकेत‍‍‍‍ सुझाव ब्यूगु दु ।

बुधवाः सिंहदरवारय् च्वंगु सेना समायोजन विशेष समितिया बैठकय् माओवादीया दुजःतय्सं सेना समायोजन प्रकृयायात व्यवस्थित रुपं न्ह्याकेत सहज जुइगु धासें उच्चस्तरीय नेतृत्व तहलय् सहलह यायेमाःगु सुझाव ब्यूगु खः । बैठकय् माओवादी नेता जनार्दन शर्मां महत्वपूर्ण राजनीतिक सहमति यानाः जक निर्णय यायेमाःगु बिचाः प्वंकादीगु ख: ।

समितिया प्रवक्त नापं मुख्य सचिव माधवप्रसाद घिमिरें बैठक बिना अवरोध नियमित रुपं न्ह्याकेत दक्वं दुजःत सहमत जूगु कनादिल ।

माओवादी दुजःतय् अनुपस्थितिइ पटक पटक स्थगित जूगु कारणं समितिं लडाकुया चेनअफ कमाण्ड, आचारसंहिता निरीक्षण व सुपरिवेक्षण सम्बन्धी कार्यविधि पारित यायेमफुनी ।