'याकनं हे न्हूगु गठबन्धन'
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' याकनं हे न्हूगु गठबन्धनया सरकार निर्माण जुइगु खँ धयादीगु दु ।
स्वन्हुन्यंकया सिंगापुर भ्रमण क्वचायेकाः बुधवाः येँ लिहांझायदिम्ह प्रचण्डं त्रिभुवन अन्तराष्ट्रिय विमानस्थलय् पत्रकारत नाप खँल्हाबंला यानादिसें आःया अप्राकृतिक गठबन्ध त्वाःदलाः न्हूगु गठबन्धन गठन जुइगु धयादिल ।
सिंगापुरय् वासः याकाच्वम्ह नेपाली कांग्रेसया सभापति गिरिजाप्रसाद कोइराला नाप मंगलवाः सिंगापुरय् जूगु सहलह लिपा राजनीतिक गतिरोध याकनं ज्यनीगुलि थः आशावादी जूगु वयेकलं धयादिल । वयेकलं सहलहया झ्वलय् कोइराला तसकं सकारात्मक व भावुक जूगु धयादिसें राष्ट्रपतिया पलाःया बारे मध्यमार्गी लँपू ज्वना वनेगु बारे सहलह जूगु कनादिल ।
वयेकलं राजनीतिक गतिरोध अन्त्यया निंतिं थौं नं निसें हे सहलह यायेगु धयादिसें ५ गते तक नं सहमति मजूसाः आन्दोलन यायेगु ख्याच्वः बियादिल ।
प्रचण्ड सिल्क एअयरया उडानं न्हिनय् १२:४५ बजे येँ थ्यंकादीगु खः । पार्टीया आन्तरिक ज्याझ्वलय् ब्वति कायेत प्रचण्ड व पार्टी विदेश विभाग प्रमुख कृष्णबहादुर महरा सोमवाः सिंगापुर वंगु खः ।
