सहमति कार्यान्वयन मजुसाः आन्दोलन : ठाकुर
सत्ता साझेदार तराई मधेश लोकतान्त्रिक पार्टीया अध्यक्ष महन्त ठाकुरं सरकार व संयुक्त मधेशी मोर्चा दथुइ जूगु च्यागू बुँदे सहमति तत्काल कार्यान्वन मजुसाः आन्दोलन यायेगु ख्याच्वः बियादीगु दु ।
मधेश जनजागरण अभियानया झ्वलय् बुधवाः भैरवहाय् ग्वसाःग्वःगु पत्रकार सम्मेलनय् न्ववानादिसें ठाकुरं मधेश आन्दोलन लिपा सरकार नाप जूगु सहमति कार्यान्वयन यायेत वर्तमान सरकार उदासिन जूगु द्वपं बियादिल । वयेकलं माओवादी, कांग्रेस व एमाले सत्तामोहलय् लानाः संविधान निर्माणयात निगूगु प्राथमिकताय् तःगु द्वपं बियादिसें स्वंगू प्रमुख दलतय् कारणं संविधान निर्माण यायेगु ज्या ल्यूने लानाच्वंगु धयादिल ।
शीर्ष नेतात सहमतिया निंतिं कुतः यानाच्वंसां उकी दुने थःथःगु स्वार्थ सुलाच्वंगुलिं जनताया इच्छा कथं न्ह्यावनेमफुगु दाबी वयेकलं यानादिल । वयेकलं जारी राजनीतिक गतिरोध अन्त्यया निंतिं प्रमुख राजनीतिक दलतय्त तमलोपां दबाव बीगु धयादिल ।
