वर्तमान सरकारया नेतृत्वय् गतिरोध ज्यनीमखु : यादव
मधेशी जनअधिकार फोरमया अध्यक्ष उपेन्द्र यादवं वर्तमान सरकारया नेतृत्वय् राजनीतिक गतिरोध अन्त्यया सम्भावना मदुगु खँ धयादीगु दु । वयेकलं आःया सरकार जनतां बुकूपिंसं चले यानाच्वंगु धयादिसें थ्व सरकार पूर्ण रुपं असफल जुइधुंकूगु दाबी यानादिल ।
बुधवाः काचनपुरया सदरमुकाम भीमनगरय् जूगु छगू पत्रकार सम्मेलनय् अध्यक्ष यादवं माओवादीं संसद अवरोध यानाः देय्यात ठप्प यानाच्वंगु सकारात्मक मजूगु धयादिसें माओवादी नेतृत्वया सरकार गठन जुइमाः धकाः भारतं चाहे मजूगु धयादिल ।
संविधानय् मदुगु अधिकार छ्यलाः राष्ट्रपतिं पलाः ल्ह्वंगुलिं देशय् थ्व समस्या वःगु दाबी वयेकलं यानादिल । वयेकलं अन्तरिम संविधानं ब्युगु अधिकार क्षेत्र स्वयां पिने वनाः राष्ट्रपतिं सेनापति प्रकरणय् हस्तक्षेप याःगुलिं देशय् राजनीतिक अस्थिरता वःगु दाबी यानदिल । वयेकलं देय्या समस्या सहलह यायेगु थाय् संसदय् राष्ट्रपतिया बारे सहलह यायेमबियाः कांग्रेस व एमालें देय्यात द्वन्द्व पाखे यंकाच्वंगु द्वपं बियादिल ।
