प्रमुख स्वंगू दलया बैठक निष्कर्ष विहीन
बजेट पारित यायेगु ई सतिना वनेवं राजनीतिक सहमतिया निंतिं कुतः नं तीव्र रुपं न्ह्याःगु दु । मंगलवाः स्वंगू प्रमुख दलत दथुइ थ्वहे विषयलय् गम्भीर सहलह जुसां सहमति धाःसा जुइमफुत ।
प्रधानमन्त्री माधवकुमार नेपालया उपस्थितिइ एनेकपा (माओवादी), नेपाली कांग्रेस व नेकपा (एमाले) दथुइ जूगु बैठकय् माओवादी नेतातय्सं बजेटया पलेसा दक्वं विषयया समाधान छक्वलं यायेत इनाप याःगु खः ।
सत्तारुढ दलत कांग्रेस व एमालें धाःसा बजेट पारित मजुयाः देशय् आर्थिक संकट वःगु धासें थुगु विषयलय् माओवादीयात गम्भीर जुइत इनाप याःगु खः । माओवादीं थःपिंसं सरकारयात ब्यूगु अल्टिमेटमय् स्वन्हू ल्यँ दनीगुलिं थ्वहे ई दुने दक्वं समस्याया समाधान मालेमाःगु अडान काःगु खः ।
माओवादी उपाध्यक्ष डा. बाबुराम भट्टराईं बजेट माओवादीया मुख्य मुद्दा मजुगु धयादिसें बजेट पारित यायेगु निंतिं न्हापा राजनीतिक माग सम्बोधन जुइमाः धयादिल । कांग्रेस नेता रामशरण महतं सहमति पाखें हे निकास मालेत सकारात्मक पहल जूगु धयादिल । वयेकलं सैद्धान्तिक हिसावं सहमतिया नापं थ्यंगु दाबी नं यानादिल ।
थ्वस्वयां न्ह्यः मंगलवाः हे सत्तारुढ एमाले, कांग्रेस व मधेशी जनअधिकार फोरम (लोकतान्त्रिक) दथुइ सहलह जूगु खः । अथेहे माओवादीं नं प्रधानमन्त्री व नेपाली कांग्रेस नाप नं सहलह याःगु खः ।
