न्हूम्ह अमेरिकी राजदूत नियुक्त
येँ (सन्ध्या टाइम्स)/अमेरिकां नेपाःया निंतिं न्हूम्ह राजदूत नियुक्त याःगु दु। नेपाःया निंतिं अमेरिकी राजदूत कथं आः स्कच एच. डेलेसीयात छ्वया हइगु जूगु दु। अमेरिकी कंग्रेसं आः नकतिनि वय्कःया नांयात समर्थन याःगु खः ।
अमेरिकी परराष्ट्र विभागय् २८ दँ ज्या यायेधुंकूम्ह डेलेसी थ्व स्वयां न्ह्यः अफ्रिकी देय् इरिट्रियाय् अमेरिकी राजदूत जुयाः ज्या यानाच्वंम्ह खः। लिसें वय्कलं अफ्रिकाया हे मेगु देय् बोत्स्वानाय् नं ज्या यायेधुंकूगु दु। थ्व निगुलिं देय् अफ्रिकाया अतिकं द्वन्द्वग्रस्त मुलुक खः। अमेरिकां नेपाः नं द्वन्द्वग्रस्त देय् जूगुलिं उकथंया हे अनुभव दुम्ह मनूयात राजदूत दयेकाः छ्वया हयेत्यंगु अनुमान दु ।
निवर्तमान राजदूत नान्सी जे. पावेलयात अमेरिकाया ओबामा सरकारं परराष्ट्र मन्त्रालयय् वरिष्ठ अधिकृत नियुक्त यायेवं नेपालय् अमेरिकी राजदूत खाली जुयाच्वंगु खः। पावेलया पालय् माओवादीलिसे स्वापू बांलाकेगु ज्या जूगु खः ।
