अमेरिकाय् नेपाली विद्यार्थी अप्वल
येँ (सन्ध्या टाइम्स)/ अमेरिकाय् ब्वं वनीपिं नेपाःया विद्यार्थीतय् ल्याः अप्वया वंगु खँ अमेरिकी राजदूतावासं जारी याःगु प्रेस विज्ञप्तिइ धयातःगु दु ।
थौं सुथय् जारी याःगु उगु विज्ञप्तिइ धयातःकथं सन् २००७ व ०८ य् अमेरिकाय् ब्वं वनीपिं नेपाली विद्यार्थीतय् ल्याः २९ दशमलव ६ प्रतिशतं वृद्धि जूगु दु ।
वंगु दँय् ८९३६ म्ह विद्यार्थीत अमेरिकाय् ब्वनाच्वंगु खःसा थ्व दँय् ११५८१ म्ह विद्यार्थीत अन ब्वनाच्वंगु खँ नं प्रेस विज्ञप्तिइ धयातःगु दु ।
विज्ञप्तिइ धयातः कथं अमेरिकाय् ब्वनीपिं अन्तर्राष्ट्रिय विद्यार्थीतय् धलखय् नेपाः झिंछगूगु स्थानय् लानाच्वंगु दु। धलखय् भारत व चीन न्हापांगु व निगूगु स्थानय् लानाच्वंगु दु ।
सन् २००६/०७ य् नेपाः झिंस्वंगूगु स्थानय् लानाच्वंगु खः।
नेपाःस्थित अमेरिकी दूतावास पब्लिक अफेयर्सया टेरी जे. ह्वाईटया कथं अमेरिकी डिग्री व प्रतिष्ठाया कारणं नेपाःया विद्यार्थीत अमेरिकाय् ब्वं वनेगु यानाच्वंगु खः।
अथे हे अमेरिकाय् ब्वं वनेगु निंतिं दूतावासं पूवंक जानकारी बीगु यानाच्वंगुलिं नं विद्यार्थी चाप अप्वया वंगु खँ धाःगु दु ।
