चमेली गुरुमांया ५० क्वःगु प्रव्रज्या दिवस
येँ (सन्ध्या टाइम्स)/धर्मकिर्ति विहार संरक्षण कोषया उपाध्यक्ष अनागारिका धम्म निन्ना (चमेली गुरुमां) प्रवज्या जुया बिज्याःगु न्यय्दँ क्यंगु लसताय् गुरुमांयात सम्मान याःगु दु ।
धर्मकिर्ति विहार संरक्षण कोषया ग्वसालय् जूगु ज्याझ्वलय् मू पाहां संस्कृति मन्त्री मिनेन्द्र रिजालं अभिनन्दन यानादीगु खः ।
उगु ज्याझ्वलय् अन्तराष्ट्रिय भिक्षुणी संघ नेपाल नापं थीथी संघसंस्थापाखें नं दोहलपा देछायेगु ज्या जूगु खः। ज्याझ्वलय् भिक्षु अश्वघोष महास्थविर, भिक्षु कुमार कश्यप, धम्मावति गुरुमांपिंसं आर्शिवचन बिया बिज्याःगु खःसा भिक्षु ञानपुर्णिक महास्थविरपाखे धर्म देशना बिया बिज्याःगु खः ।
ज्याझ्वलय् लोचनतारा तुलाधरं चमेली गुरुमांया व्यक्तित्व व जीवन न्यंकादीगु खःसा अभिनन्दित गुरुमांपाखें नं थःगु नुगः खँ प्वंकादीगु खः। ज्याझ्वलय् परियत्ति शिक्षा ब्वनाच्वंपिं विद्यार्थीपाखें परित्राण सूत्र पाठ याःगु खः ।
