नेप्से हाकनं ५ अंकं कुहां वन
येँ (सन्ध्या टाइम्स)/स्टक एक्सचेन्जय् जुयाच्वंगु शेयर कारोबारं लगानीकर्तात अझं ढुक्क जुइफुगु अवस्था खने मदुनि। छन्हु न्ह्यःया शेयर कारोबारं सामान्य थहां वंगु नेप्से परिसुचक म्हिगः हाकनं कुहां वःगु दु। राजनीतिक स्थिति अस्थिरपूर्ण जुयाच्वंगुलिं हे शेयर कारोबारनं अन्यौलय् लानाच्वंगु लगानीकर्तातय् धापू दु। म्हिगः नं बजाः चालेवं कुहां वंगु नेप्से परिसुचक अन्त तकं व हे गति काःगु खनेदत। कारोबारया शुरु निसें हे कुहां वनाच्वंगु नेप्सें ह्याउँ ध्व पुलेफुसां सामान्यतः थी जक फत ।
छन्हु न्ह्यःया कारोबार जूगु दक्वं समुहया परिसुचक थहां वंगु खःसा म्हिगः उकिया पाय्छि अःखः दक्वं सुचक कुहां वःगु दु। अप्वः थें वाणिज्य बैंक समुहया शेयर भाः कुहां वयेव. नेप्से नं कहां वःगु दु। बीओकेया ६०/-, नविलया ५०/-, कुमारीया ४२ /- तका प्रति कित्ता शेयरया लिसें मेमेगु नं बैंकया शेयर भाः कुहां वयेवं नेप्से ५ दशमलव १२ अंकं कुहां वनाः ५६१ दशमलव ८२ अंकय् थ्यंगु दु। सेन्सेटिभ नं छन्हु थहां वंगु तुलनाय् स्वयां अप्वः १ दशमलव ५४ अंकं कुहां वःगु दु। अथे हे फ्लोट नं छन्हु न्ह्यः स्वयां अप्वः शुन्य दशलवम ६४ अंकं कुहां वल ।
अथे हे कारोबार जूगु सुचकया लिसें जलविद्युत समुहया उपसुचक छगू बाहेकं मेगु दकवं उपसुचक कुहां वंगु दु। जलविद्युत समुह १ दशमलव ३५ अंकं थहां वनाः ८१९ दशमलव १ अंकय् थ्यंगु दु। उखे कुहां वःगु उपसुचकय् दकलय् अप्वः अन्य समुह १० दशमलव ५७ अंकं कुहां वनाः ५९५ दशमलव ६९ अंकय् थ्यंगु दु। वाणिज्य समुह ७ दशमलव २२ अंकं कुहां वयेवं ५३७ दशमलव ५१ अंकय् थ्यन। विकास बैंक समुह नं ९ दशमलव ६२ अंकं कुहां वयाः ६१४ दशमलव ८६ अंकय् थ्यंगु दु। फाइनान्स समुह १ दशमलव ५९ अंकं कुहां वयाः ५९९ दशमलव ९५ अंकय् थ्यन। उखे वीमा समुहपाखें धाःसा म्हिगः छुं हे कारोबार मजू
।
म्हिगः कारोबार कम्पनी कुहां वंसां वंगु छुं न्हि न्ह्यःया तुलनाय् म्हिगः नेप्सेय् शेयर व दांया कारोबार थहां वंगु दु। न्यय्खुगू कम्पनीया छगू लाख प्यसः व न्हय्खुगू कित्ता शेयर न्याये-मी जुयाः न्यागू करोड ख्वीच्यागू लाख न्हय्गुद्वः तका दां कारोबार जुल। छन्हु न्ह्यः चय्न्याद्वः व गुसः व नीप्यंगू कित्ता शेयर न्याये-मी जुयाः प्यंगू करोड निगू लाख व ग्वीन्याद्वः तका दांया कारोबार जूगु खः ।
दांया ल्याखं म्हिगः दकलय् अप्वः स्टायण्डर्ड चार्टर्ड बैंकं न्हय्न्यागू लाख ख्वीच्याद्वः तका दांया शेयर कारोबार याःगु दु। जनरल फाइनान्स लिमिटेडं दकलय् अप्वः कमे याःगु दुसा कुमारी बैंकं अप्वः द्यापं फयेमाल ।
