कोइराला व प्रचण्ड दथुइ सिंगापुरय् खँल्हाबंला
नेपाली कांग्रेसया सभापति गिरिजाप्रसाद कोइराला व एनेकपा (माओवादी)या अध्यक्ष पुष्पकमल दाहाल 'प्रचण्ड' दथुइ सिंगापुरय् खँल्हाबंला जूगु दु ।
सिंगापुरया ग्लेनेगल्स हस्पिटल एण्ड मेडिकल सेन्टरय् वासः वाकाच्वनादिम्ह कांग्रेस सभापितं माओवादी अध्यक्षयात मध्यमार्गी लँपू मालाः समस्या समाधान यायेत इनाप यानादिल । वयेकलं राष्ट्रपतिया बारे छुं खँ न्ह्यमथंसें सहमति यायेत नं इनाप यानादिल ।
माओवादी अध्यक्ष प्रचण्डं धाःसा राष्ट्रपतिया पलाः छुं नं छुं कथं भिंकेमाःगु अडान कयादीगु खः । अथेहे निम्ह नेतात दथुइ उच्चस्तरिय राजनीतिक संयन्त्र निर्माण यायेगु विषयलय् खँल्हाबंला जूगु दु । निम्ह नेतात दथुइ कोइराला येँ लिहांझायेधुंकाः उगु संयन्त्र निर्माण यायेगु सहमति जूगु दु ।
सिंगापुर भ्रमणय् दिम्ह माओवादी अध्यक्ष प्रचण्ड बुधवाः येँ लिहाझाइगु ज्याझ्वः दुसाः कांग्रेस सभापति कोइराला स्वास्थ्य उपचार लिपाः आइतवाः येँ लिहांझायादी ।
