सहमति मजुसाः बहुमत पाखें बजेट पारित याइगु
सत्ता साझेदार दलत नेपाली कांग्रेस व नेकपा (एमाले) दथुइ मंसिर ५ गते दुने सहमतिया साथ मखुसाः बहुमतं बजेट पारित यायेगु सहमति जूगु दु ।
सोमवाः सनिलय् प्रधानमन्त्री निवास बालुवाटारय् जूगु सहलहलय् निगूलिं दलं माओवादीं बजेट पारित यायेमब्यूसाः विरोधया बावजुद बहुमतया आधारय् बजेट पारित यायेगु निष्कर्ष पिकागु खः । एमाले प्रमुख सचेतक भीम आचार्यं जुसाः सहमतिया आधारय् व अथे सम्भव मजुसाः बहुमतया आधारय् बजेट पारित याकेगु सहमति जूगु धयादिल ।
बैठकय् नेपाली कांग्रेसया नेतातय्सं न्ह्याथे यानाः जुसां बजेट पारित यायेमाःगु खँय् बः ब्यूगु खः । अथेहे प्रधानमन्त्री माधवकुमार नेपालं नं बजेट पारित जुइमफया आर्थिक संकट उत्पन्न जूगु धायेवं सत्तारुढ दलतय्सं न्याथेयानाः जुसां बजेट पारित यायेमाःगु खँ क्वछीउगु खः ।
थ्वस्वयां न्ह्य: एमालें प्रमुख प्रतिपक्षी एनेकपा (माओवादी) नाप राजनीतिक गतिरोध ज्यंकेगु बारे सहलह याःगु दु । एमालेया सिंहदरवारय् च्वंगु संसदीय दलया ज्याकूथी जूगु सहलहलय् माओवादीं राष्ट्रपति विरुद्धया प्रस्तावय् लचकता क्यनेत एमालेयात इनाप याःगु खः । तर एमालें धाःसा राष्ट्रपतियात द्वपं बियाः प्रस्ताव पेश याये मफइगु खँ धाःगु खः । अथेहे बैठकय् मंकाः संकल्प प्रस्तावया भाषाया बारे नं सहलह जूगु खः ।
