हिमानीं थौं नेपाः त्वःतीगु
पुलांम्ह युवराज्ञी हिमानी शाहं थौं नेपाः त्वःतेत्यंगु दु । थौं न्हिनय् वय्कः थः स्वम्हं मस्त ज्वनाः थाई एअरवेजया विमानं प्रान्स वनेत्यंगु खः । थौं न्हिनय् १ बजे वय्कःया उडान दु ।
सूत्रया कथं वय्कः प्रान्सया राजधानी पेरिशय् च्वनादी । अन च्वनाः वय्कः हानं नेपाः लिहां वइ वा मइ मखु धइगु ठेगानमदुगु खँ सूत्रं धाःगु दु । वय्कःया जहान एवं पुलांम्ह युवराज पारस शाह धाःसा थौंकन्हय् सिंगापुरय् च्वनाच्वंगु दु । उकुन्हु थः तःधीम्ह म्ह्याय् पुर्णिकाया बुन्हि हनेत नेपाः झाःम्ह पुलांम्ह युवराज पारस हानं सिंगापुर लिहां वनेधुंकूगु दु ।
देशय् राजतन्त्र मदयेधुंकाः पारसं थः मस्तय्त सिंगापुरय् ब्वंकगु व्यवस्था यायेत्यंगु खःसां अन ब्वंके मफयाः हानं नेपाः तुं लित हःगु खः । थुकिया नापनापं भाःतलिसे ल्वापु तच्वयाः हिमानीं पारसलिसे पारपाचुकेगु प्रस्ताव समेत छ्वयेधुंकूगु खँ नं सूत्रं धाःगु दु ।
