मातृका माओवादीया मधेश बन्द
येँ (सन्ध्या टाइम्स)/प्रहरीं ज्वंपिं थः कार्यकर्तायात त्वःतेमाःगु माग यासें पुनर्गठित माओवादी मातृका पुचलं अनिश्चितकालिन मधेश बन्दया घोषणा याःगु दु।
वीरगञ्ज भन्सार प्रमुख केवलप्रसाद भण्डारीयात हातपात याःगु द्वपनय् ज्वनातःम्ह ध्रुव यादवयात त्वःतेमाःगु माग यासें थ्व बन्द याःगु खः ।
बन्दं यानाः रुपन्देही, बारा, पर्सा, सप्तरी, सिराहा, उदयपुर, धनुषा, सुनसरी मोरङ्ग, कपिलवस्तु व नवलपरासी जिल्लाया कलकारखाना, यातायात, बजाः नापं शिक्षण संस्था बन्द जुयाच्वंगु दु ।
थ्वहे झ्वलय् बन्द याकः वनाच्वंपिं स्वम्हेसित प्रहरीं सुनसरीया इनरुवां ज्वंगु दु। अथे हे विराटनगरं नं स्वम्हेसित ज्वंगु खँ धाःगु दु। बन्द आह्वान यानाः सतक अवरुद्ध यानाच्वपिं माओवादीया कार्यकर्तातय्सं प्यंगः गाडी नं तोडफोड याना बिउगु दु ।
माओवादी कार्यकर्तां सतक अवरुद्ध यानाच्वंगुलिं यानाः राजमार्गय् नं म्हो जक सवारी साधन चले जुयाच्वंगु खँ सीदुगु दु ।
माओवादी कार्यकर्तातय्सं वीरगञ्जय् टायर च्याकाः प्रदर्शन यानाच्वंगु दु। अनया स्थिति भचा तनावपूर्ण जुयाच्वंगु खँ धाःगु दु ।
