सभामुखपाखें थःगु हे पहल
येँ (सन्ध्या टाइम्स)/राजनीतिक निकास पिकायेगु झ्वलय् सहलह यायेत सभामुख सुवास नेम्वाङ्गं थौं सुथय् प्रधानमन्त्री माधव नेपाल नापलासें थःगुपाखें पहल शुरु यानादीगु दु। थौं प्रमलिसे वय्कलं माओवादीं यानाच्वंगु सदन अवरुद्ध व उकिया निकासया निंतिं सहलह ब्याकादीगु खः।
सभामुख नेम्वाङ्गं प्रमयात थौं हे सत्तारुढ दल व माओवादी लिसे सहलह यानाः निकास पिकायेत इनाप यानादीगु खःसा लिसलय् प्रमं संवादया निंतिं थः सकारात्मक दुगु बिचाः प्वंकादीगु खः। सभामुख नेम्वाङ्गं फुक्कं दलया सचेतकतलिसे जूगु सलहल व सहमतिया न्हूगु खाका बारे नं प्रमयात कनादीगु खः। लिसें माओवादीं यानाच्वंगु गुनासो बारे नं सभामुखं प्रमयात अवगत याकादीगु खः ।
प्रचण्डं फोन मल्ह्वं
खँल्हाबल्हाया झ्वलय् सभामुखया न्ह्यःने हे प्रम नेपालं सल्लाह यायेत माओवादी अध्यक्ष प्रचण्डयात फोन यानादीगु खः। तर प्रचण्डं प्रमया फोन धाःसा रिसिभ मयाःगु खँ सीदुगु दु। प्रमं निक्वः स्वक्वः तक डायल यातं नं फोन मल्ह्वंगु खँ धाःगु दु ।
