मोर्चालिसे न्यागू बुँदाया सहमित
सरकार व मधेशय् आन्दोलन याना वयाच्वंगु सशस्त्र पुचः संयुक्त तराई जनतान्त्रिक मोर्चाया दथुइ जनकपुरय् थौं सुथय् जूगु वार्ताय् न्यागू बुँदे सहमतिइ जूगु दु ।
उगु न्यागू बुँदाया सहमतिइ थिनंनिसें सशस्त्र पुचलं यानाच्वंगु कारवाही दिकेगु, वार्ताय् वयाच्वंपिं वार्ताकारतय् सुरक्षाया जिम्मा वार्ता जःछि सरकारं कायेगु मोर्चाया माग बारे सूची दयेकाः येँय् वार्ता जुइबलय् सरकारयात न्ह्यब्वयेगु, मधेश आन्दोलनया झ्वलय् ज्वंपिं मधेशी कार्यकर्ताया धलः दयेकाः सरकारयात लःल्हायेगु, मोर्चाया कार्यकर्तायात नं राजनीतिक रुपं स्वयेगु, मधेशय् आन्दोलन याना वयाच्वंगु मेमेगु पुचःलिसे वार्ता यायेगु निंतिं मोर्चां माःगु भूमिका म्हितेगु व मेगु वार्ताया निंतिं निगुलिं पुचः च्वनाः सहमति कायम यायेगु सहमति जूगु दु । निगूगु चरणया वार्ता येँय् यायेगु सहमति नं जूगु दु ।
थ्वहे झ्वलय् तराई जनतान्त्रिक मुक्ति मोर्चां थिनंनिसें तराई लागाय् गुगुं नं कथंया सशस्त्र गतिविधि मयायेगु घोषणा याःगु दु । थौंया वार्ताय् शान्ति तथा पुनर्निर्माण मन्त्री जर्नादन शर्मा व मोर्चापाखें संजय गुप्ता (कौटिल्य शर्मा) च्वंगु खः ।
