नेप्से सामान्य थहां वन
येँ (सन्ध्या टाइम्स)/स्टक एक्सचेन्जय् छवाः लिपा हाकनं नेप्से परिसुचक सामान्य थहां वंगु दु। छवाः न्ह्यः तक लगातार थहां वनेधुंकूगु नेप्से वयां लिपा हाकनं कुहां वयेगु शुरु जूगु खः। बजाः चालेवं हे नेप्से थहां वंगु खःसा पलख लिपा हे हाकनं कुहां वःगु खः। नेप्से थहां कुहां जुइगु क्रम बजाः बन्द जुइ न्ह्यः तक नं जारी जुयाच्वंगु खः। मदिक्क निरन्रता कयाच्वंसां अन्तय् बजाः बन्द जुइ बाघौ न्ह्यः तक नं थुगु क्रमं निरन्तरता कयाच्वंगु खः ।
हाकनं छक्वः कारोबार जूगु दक्वं समुहया परिसुचक थहां वंगु दु । कारोबार जूगु बैंकमध्ये दकलय् अप्वः नविल, एभरेष्ट व लक्ष्मी बैंकया शेयर भाः थहां वनेवं नेप्से नं थुगु वाःया न्हापांगु न्हि सामान्य थहां वंगु खः। थुगु बैंकया शेयर भाः थहां वनेवं नेप्से नं १ दशमलव शुन्य ८ अंकं थहां वनाः ५६६ दशमलव ९४ अंकय् थ्यंगु दु। म्हिगःया कारोबारय् नेप्सेस्वयां अप्वः सेन्सेटिभ १ दशमलव २५ अंकं थहां वंगु दु। फ्लोट नं शुन्य दशमलव २९ अंकं थहां वन ।
नेप्से परिसुचक जक मखसे कारोबार जूगु निगू समुहया उपसुचक त्वःता मेगु दक्वं समुहया उपसुचकत नं म्हिगः थहां वन। दकलय् अप्वः नेप्सेय् प्रभाव लाकीगु वाणिज्य समुह ४ दशमलव ६३ अंकं थहां वनाः ५४४ दशमलव ७३ अंकय् थ्यंगु दु। वाणिज्य समुह धुंकाः फाइनान्स समुह ३ दशमलव ४१ अंकं थहां वनाः ६०१ दशमलव ५४ अंकय् थ्यंगु दु। जलविद्युत समुह २ दशमलव शुन्य ३ अंकं थहां वनाः ८१७ दशमलव ७५ अंकय् थ्यन। मेखे म्हिगःया कारोबारय् होटल समुहया उपसुचक नं १ दशमलव १४ अंकं थहां वनाः ३६९ दशमलव ७५ अंकय् थ्यंगु दु ।
उखे कुहां वःगु उपसुचकत मध्ये अन्य समुह १० दशमलव ५७ अंकं कुहां वयाः ६०६ दशमलव २६ अंकय् थ्यंगु दुसा विकास बैंक समुह १ दशमलव ९४ अंकं कुहां वनाः ६२४ दशमलव ४८ अंकय् थ्यन ।
शेयर कारोबार याःगु न्यय्गुंगू कम्पनीमध्ये नीन्हय्गू कम्पनीया शेयर थहां वंगु दुसा नीनिगू कम्पनीया भाः कुहां वंगु दु। ल्यं झिगू कम्पनीया यथावत हे जुल। म्हिगः मुक्कं चय्न्याद्वः व गुसः व नीप्यंगू कित्ता शेयर न्याये-मी जुयाः प्यंगू करोड निगू लाख व ग्वीन्याद्वः तका दांया कारोबार जुल। कारोबार याःगु कम्पनी मध्ये नं प्राइम कमर्सियल बैंकं दांया ल्याखं दकलय् अप्वः पीस्वंगू लाख झिंप्यद्वः तका दांया कारोबार याःगु दु। लक्ष्मी बैंकं दकलय् अप्वः कमे याःगु दुसा इन्फ्रास्ट्रक्चर डेभलपमेण्ट बैंकं द्यापं फयेमाःगु दु ।
सिदार्थ डेभलपमेण्ट बैंकया ११,०४९ कित्ता शेयर कारोबार जूगु दुसा प्रभु फाइनान्सं २१२ क्वः कारोबार याःगु दु ।
