सत्तारुढ स्वंगू दल दथुइ न्यान्हुया दुने बजेट पारित यायेगु सहमित
आन्दोलनरत एनेकपा (माओवादीं) संसदय् अवरोध यानाच्वंसां सत्तारुढ प्रमुख स्वंगु दल दथुइ न्यान्हु दुने थुगु आर्थिक दँया बजेट पारित यायेगु सहमति जूगु दु ।
सोमवाः प्रधानमन्त्री निवास बालुवाटारय् नेपाली कांग्रेस, नेकपा (एमाले) व मधेशी जनअधिकार फोरम (लोकतान्त्रिक) दथुइ जूगु सहलहलय् बजेट पारित यायेत सहमतिया कुतः यायेगु तर सहमति मजुसाः मेगू उपाय मालाः जुसां न्यान्हूया दुने बजेट पारित यायेगु निर्णय याःगु खः । उपप्रधानमन्त्री विजयकुमार गच्छदारं सरकार सहमति यानाः हे बजेट पारित यायेगु पक्षय् दु धयादिसें सहमतिया निंतिं कुतः यायेगु तर सहमति मजुसाः मेगू हे तरिकां बजेट पारित यायेगु कनादिल ।
अथेहे सहलहलय् ब्वति कयादिम्ह एमाले नेता केपी शर्मा ओलीं बुधवाः बजेट पारित जुइगु दाबी यानादिल । तर वयेकल छु उपाय छ्यलाः बजेट पारित जुइगु धाःसा धायामदी ।
स्वंगू दल दथुइ जूगु सहलहलय् वर्तमान गतिरोध ज्यंकेगु निंतिं मंकाः संकल्प प्रस्ताव पेश यानाः हे समस्या ज्यंकेमाःगु निर्णय याःगु दु । बैठकं राष्ट्रपतिया पलाःया बारे संकल्प प्रस्तावय् छुं नं खँ न्ह्यमथंसें पेश यायेगु व लिपाः राष्ट्रपतियात छगू वक्तव्य पिकायेत इनाप यायेगु वा माओवादीयात महाअभियोग लगे याकेफइगु बारे सहलह जूगु खः ।
