अवरुद्ध संसद चायेकेगु बारे सभामुख पाखें प्रमया ध्यानाकर्षण
सभामुख सुवाषचन्द्र नेम्वाङं अवरुद्ध संसद चायेकेगु बारे प्रधानमन्त्री माधवकुमार नेपालया ध्यानाकर्षण याकादीगु दु ।
सोमवाः सुथय् प्रधानमन्त्री निवास बालुवाटार थ्यंकाः सभामुख नेम्वाङं ताः ई न्ह्यः निसें संसदय् जुयाच्वंगु अवरोधया कारणं जनतया अत्यावश्यक मुद्दाय् सहलह जुइमफुगु धासें संसद चायेकेगु बारे ध्यानाकर्षण याकादीगु खः । नापं वयेकलं राजनीतिक गतिरोधया कारणं संविधान निर्माण यायेगु ज्या प्रभावित जूगु बारे नं प्रमया ध्यानाकर्षण याकादीगु खः ।
सभामुख नेम्वाङं थम्हं थीथी पक्ष नाप यानागु सहलहया आधारय् प्रधानमन्त्री नेपाल नाप खँल्हाबंला यानागु कनादिल । वयेकलं अवरुद्ध संसद, संविधान निर्माण लगायत समसामयिक विषयलय् खँल्हाबंला जूगु धयादिल ।
अथेहे वयेकलं बजेट पारित मजुसाः जुइगु आर्थिक संकटया बारे नं प्रधानमन्त्री नेपाल नाप सहलह यानादीगु खः । प्रधानमन्त्री नेपालं बजेट सहमतिया माध्मं हे पारित यायेमाःगु धयादिसें थुकीया बारे दलत नाप सहलह जुयाच्वंगु व थःम्हं कुतः यानाच्वनागु जानकारी बियादिल ।
खँल्हाबंला लिपाः पत्रकारत नाप खँल्हाबंला यानादिसें सभामुख नेम्वाङं जर्वजस्ती व मेमेगू विकल्पया माध्यमं बजेट पारित यायेत थःत थीथी पक्ष पाखें दबाव व:गु धयादिल । वयेकलं थः दलतय् सहमतिया माध्य पाखें हे बजेट पारित यायेमागु पक्षय् दुगु धयादिसें प्रधानमन्त्रीया नं थ्व हे बिचाः दुगु धयादिल ।
