माओवादीपाखें अनिश्चितकालीन मधेश बन्द
मातृका यादवं नेतृत्व याःगु पुनर्गठित नेकपा (माओवादीं) सोमवाः निसें अनिश्चितकालीन मधेश बन्दया आह्वान याःगु दु ।
बन्दया कारणं सोमवाः तराईया थीथी क्षेत्रया जनजिवन प्रभावित जूगु दुसाः दक्वं कथंया यातायात चले जुइफुगु मदु । राजमार्गय् नं यातायातया साधन चलेमजुयाः पहाडी जिल्ला उदयपुर, खोटांग, ओखलढुंगा जुयाः चलेजुइगु सवारी साधन प्रभावित जूगु दु । बन्दया कारणं लहान बजाः, गोलबवार, मिर्चैया, सिरहा, राजविराज, चारदह, कञ्चनपुर लगायत थाय् पूर्ण रुपं बन्द जूगु दु ।
बन्दया झ्वलय् लहानय् बजाः बन्द याकाः जुपिं च्याम्ह माओवादी कार्यकर्तायात प्रहरीं ज्वंगु दु । प्रहरीं माओवादीया जिल्लास्तरीय नेता चौधरी महतो सहित च्याम्हेसित ज्वनाः यंकूगु ख: । माओवादीया पार्टीया केन्द्रीय दुजः जगत यादवं थःपिनिगु शान्तिपूर्ण आन्दोलनय् प्रहरीं हस्तक्षेप यानाः कार्यकर्तातय् ज्वनाः यंकूगु द्वपं ब्यूगु दु ।
माओवादीं ध्रुव यादव सहित थः कार्यकर्तातय्त पर्सा प्रहरीं ज्वना यंकूगु विरोधय् मधेश बन्दया आह्वान याःगु दु । माओवादीं थ्व बन्द ज्याझ्वलय् अवरोध याःसा थ्वस्वयां कडा प्रतिकार यायेगु ख्याच्वः ब्यूगु दु ।
