सरकार विरुद्ध अविश्वासया प्रस्ताव ह्येत चन्दया हाथ्या
पुलाम्ह प्रधानमन्त्री लोकेन्द्रबहादुर चन्दं एनेकपा (माओवादी)यात प्रधानमन्त्री माधवकुमार नेपालं नेतृत्व याःगु सरकार विरुद्ध अविश्वासया प्रस्ताव ह्येत हाथ्या बियादीगु दु ।
आइतवाः येँया रिपोटर्स क्लबय् जूगु साक्षात्कार ज्याझ्वलय् न्ववानादिसें वयेकलं वर्तमान राजनीतिक गतिरोध ज्यंकेगु निंतिं संवैधानिक व सदनया लँपू पाखें हे न्ह्या वनेत नं माओवादीयात इनाप यानादिल । वयेकलं माओवादीया निंतिं अविश्वासया प्रस्ताव ह्येगु हे उत्तम विकल्प जुइगु नं धयादिल ।
राष्ट्रिय प्रजातन्त्र पार्टीया वरिष्ठ नेता नापं जुयादिम्ह चन्दं राजनीतिक सहमतिया निंतिं प्रधानमन्त्री नेपालं माओवादी अध्यक्षया थासय् च्वनाः बिचाः यायेमाःगु व माओवादी अध्यक्षं प्रधानमन्त्रीया थासय् च्वनाः बिचाः यायेमाः धयादिल । वयेकलं दक्वस्यां थःथःगु थासं जक बिश्लेषण यासाः समस्याया समाधान पिहांमवइगु दाबी यानादिल ।
अथेहे माओवादीया उपाध्यक्ष नारायणकाजी श्रेष्ठ 'प्रकाशं' सरकार विरुद्ध अविश्वासया प्रस्ताव ह्येगु धयादिल । वयेकलं सहमतिया लूखा च्यायेकेत प्रधानमन्त्रीयात बारम्बार इनाप यानागु खँ न्ह्यथंनादिसें अविश्वासया प्रस्ताव हयाः जुसां सरकार क्वथलेगु ख्याच्वः बियादिल ।
वयेकलं माओवादी राष्ट्रिय सहमतिया सरकारया पक्षय् दुगु धयादिसें थःपिं ल्या:चाया कासां सरकार क्वथलेगु पक्षय् मदुगु धयादिल । वयेकलं सहमतिया माध्यमं हे थःपिं दक्वं समस्याया समाधान जुइमाः धइगु पक्षय् दुगु तर आवश्यक जूसाः अविश्वासया प्रस्ताव ह्येत थःपिं तयार जूगु धयादिल ।
