'प्रमुख दलत दथुइ सहमति कायम यानाः राष्ट्रिय सरकार'
मधेशी जनअधिकार फोरमया अध्यक्ष उपेन्द्र यादवं प्रधानमन्त्री माधवकुमार नेपाल याके राष्ट्रिय सहमतिया सरकार निर्माण यायेगु अवसर मदयेधुंकूगु खँ धयादीगु दु । वयेकलं यथास्थितिइ फोरम सरकारय् मवनीगु खँ धयादिसें प्रमुख दलत दथुइ सहमति कायम यानाः राष्ट्रिय सरकार निर्माण यायेमाःगु खँय् बः बियादिल ।
कार्यकर्ता प्रशिक्षणया निंतिं आइतवाः धनगढी थ्यंकादिम्ह यादवं न्हूगु राष्ट्रिय सहमतिया सरकार निर्माण यायेगु ईलय् सरकारया नेतृत्व याइम्ह मनू दलत स्वयां पिने याम्ह नं ह्येफइगु धयादिल । वयेकलं दक्वं दलया माग व समस्याया सूचीलय् व्यापक सहलह यायेधुंकाः राष्ट्रिय सहमतिया आधार तय जुइगु धयादिसें जनमतया आधारय् शक्ति विभाजन व नेतृत्व क्वछीमाःगु धयादिल ।
वयेकलं अज्याःगु सरकराय् बूपिं मखसें त्यापिं वनेमाः धयादिसें बहुमत व अल्पमतया सरकार निर्माण यायेगु व क्वथलेगु ज्या आः अन्त्य जुइमाःगु खँय् बः बियादिल । वयेकलं वर्तमान सरकार नाप न्हापा मधेशया मुद्दाय् जूगु सहमति व सम्झौता बारे सहलह यायेत तयार जूसां सरकारय् वनेगु छुं सम्भावना मदु धयादिल ।
