सत्ताया निंतिं आन्दोलन: विप्लव
येँ (सन्ध्या टाइम्स)/माओवादीं न्ह्याकाच्वंगु आन्दोलन सत्ता प्राप्त यायेगु निंतिं हे जूगु खँ माओवादीया पोलिटब्यूरो दुजः नेत्रविक्रम चन्द 'विप्लवं' धयादीगु दु ।
थौं सुथय् क्रान्तिकारी पत्रकार संघ बाँके नेपालगञ्जय् ग्वसाः ग्वःगु पत्रकार नापलायेगु ज्याझ्वलय् वय्कलं सत्ता प्राप्त यायेगु निंतिं हे माओवादीं झिदँया जनयुद्ध न्ह्याकूगु खँ नं कनादीगु दु ।
वय्कलं नागरिक सर्वोच्चया निंतिं थःपिंसं आन्दोलन यानाच्वनागु खँ कनादिसें सरकारया नेतृत्व माओवादीं यात धाःसा जक नागरिक सर्वोच्चता स्थापित जुइगु दावी नं यानादिल ।
वय्कलं उगु इलय् माओवादी नेतृत्वया सरकारया विकल्प मदुगु खँ धासें माओवादीया नेतृत्वय् जक जनताया संविधान च्वये फइगु दावी नं यानादीगु दु ।
पत्रकारतय्सं न्यंगू छगू न्ह्यसःया लिसः बियादिसें वय्कलं थःपिनि विरुद्ध षडयन्त्र जुयाच्वंगुलिं सरकार त्वःताः सडकय् वयाः आन्दोलन यायेत थःपिं बाध्य जूगु खँ नं कनादिल। नागरिक सार्वेच्चता स्थापित मजूतले थःपिनि आन्दोलन मदीगु ख्याच्वः बियादिसें वय्कलं सडक आन्दोलनं हे जक नागरिक सर्वोच्चता स्थापित याये फइगु खँ नं कनादिल ।
