आन्दोलन बारे अनमिनया जिज्ञासा
येँ (सन्ध्या टाइम्स)/ माओवादी अध्यक्ष प्रचण्ड व संयुक्त राष्ट्र संघीय मिशन अनमिन प्रमुख करिन लेनग्रीन दथुइ थौं सुथय् खँल्हाबल्हा जुल ।
प्रचण्ड निवास खुसिबुँइ जूगु उगु नापलायेगु ज्याय् अनमिन प्रमुख लेनग्रीनं माओवादीं न्ह्याकाच्वंगु आन्दोलनं संविधान च्वयेगु ज्या व शान्ति प्रक्रियाय् लाके फइगु लिच्वः बारे जिज्ञासा तयादीगु खःसा लिसलय् माओवादी अध्यक्ष प्रचण्डं थः संविधान निर्माण प्रक्रियाया विरोधी मखु धासें बरु राष्ट्रपतिया असंवैधानिक पलाःपाखें नीस्वंगु सरकारं संविधान दयेकल धाःसा जनताया वास्तविक संविधान च्वये मफइगु बिचाः प्वंकादीगु खः ।
प्रचण्ड नापलायेगु झ्वलय् मय्जु लेनग्रीनं नेपालय् राष्ट्रिय सरकार स्वनेमाः धकाः राष्ट्रसंघया महासचिव बान कि मुनं बियादीगु अभिव्यक्ति व उकियात कयाः थनया राजनीतिक पार्टीतय्सं प्वंकूगु आपत्तियात कयाः नं चिउताः प्वंकादीगु खः
।
वय्कलं राष्ट्र संघया सुरक्षा परिषदय् नेपाःया स्थितिबारे महासचिव मुनं न्ह्यब्वयादीगु प्रतिवेदनयात कयाः नं प्रचण्डयात जानकारी याकादीगु खः। उगु इलय् माओवादी अध्यक्ष प्रचण्डं बान कि मुनया प्रतिक्रिया सकारात्मक जूगु खँ धयादीगु खः ।
