विराटया भिंतुना तुच्चा
ख्वप (सन्ध्या टाइम्स)/ नेसं ११३० न्हूदँया लसताय् विराट नेपालभाषा साहित्य सम्मेलन गुथिपाखें म्हिगः छगू भिंतुना तुच्चा ज्याझ्वः यात। विराट गुथिया नायः त्रिरत्न शाक्यया सभापतित्वय् जूगु ज्याझ्वलय् नेवाः देय् गुथिया नायः व नेवाः स्वायत्त राज्य मंकाः संघर्ष समितिया मूकजि नरेन्द्रभक्त हाडा, नेपालभाषा मंका: खलः यलया न्वकु किरण शाक्य, लोकतान्त्रिक नेवाः संघया नायः सानुराजा शाक्य, नेवाः मुक्ति मंकाः दबूया दांभरि कृष्णलाल गोजा श्रेष्ठपिंसं थौंया इलय् नेवाःतय्के राजनैतिक अभिरुचि व जागरणया अभाव जुगुलिं नेवाः संघ संस्थात थीथी थाय् व त्वाःत्वालय् गां गामय् वनाः नेवाः जागरण अभियान न्ह्याकेमाःगु खँ कुलादीगु खः। वय्कःपिंसं थ्वहे वइगु पुस ११ गते जुइगु नेवाः स्वायत्त राज्य घोषणा सभाय् ब्वति कायेत नं सकसितं इनाप यानादिल ।
ख्वप नपाया पुलांम्ह उपमेयर व समसामयिक अध्ययन समाजया ओमचरण अमात्यं सुनानं गुगुं स्वायत्त राज्य घोषणा याये न्ह्यः वपाखें वइगु दुष्परिणामया सामना याये फइगु हैसियत दयेमाः धकाः सल्लाह बियादिल।
ज्याझ्वलय् नेपालभाषाया थीथी खलः पुचःया दुजःतय्सं नं न्ववानादीगु खःसा थीथी ग्वाहालिमिपिंत हनापौ नं लःल्हाःगु खः ।
