नेप्से छवालय् २१ अंकं कुहां वन
येँ (सन्ध्या टाइम्स)/नेपाल स्टक एक्सचेन्जय् थुगु वालय् जूगु शेयर कारोबारं नेप्से परिसुचक २१ दशमलव ३५ अंकं कुहां वंगु दु। थुगु वालय् ५८७ दशमलव २१ अंकं शुरु जूगु शेयर कारोबार वाःया लिपांगु न्हि ५६५ दशमलव ८६ अंकय् थ्यंकाः बजाः बन्द जूगु खः ।
निरन्तर कुहां वनाच्वंगु नेप्से वंगु वालय् सुधार जुयाः छवाःया दुने १८ अंकं तक थहां वनेधुंकूगु खः ।
स्टक एक्सचेन्जय् थुगु वालय् ग्वीछगू कम्पनीया ५४०८ कारोबारं खुगू लाख व निद्वः व खुसः कित्ता शेयर न्याये-मी जुयाः स्वीछगू करोड झिंछगू लाख ख्वीखुद्वः तका दां बराबरया कारोबार जुल। थ्व स्वयां न्ह्यः वंगु वालय् नेप्सेय् चय्खुगू कम्पनीया ४४०६ कारोबारं न्यागू लाख चय्खुद्वः व सछि कित्तापाखें स्वीनिगू करोड ख्वीच्यागू लाख चयगुद्वः तका दांया कारोबार जूगु खः ।
'क' वर्गया कम्पनीया कारोबार मापन याइगु सेन्सेटिभ नं वाःया न्हापांगु न्हिया तुलनाय् ७ दशमलव ०९ अंकं कुहां १४० दशमलव ७० अंकय् थ्यंगु दु ।
थ्व वालय् 'क' वर्गया कम्पनीं जक झिंन्हय्गू करोड झिगू लाख तका दां बराबरया कारोबार जुल। नेप्सेय् जूगु थ्व कूल कारोबारया ५४ दशमलव ९० प्रतिशत खः ।
थ्व वालय् निगू करोड ७० लाख दां कारोबार याःगु लिधंसाय् प्राइम कमर्सियल बैंक, न्हय्छद्वः कित्ता शेयर कारोबार याःगु लिधंसाय् डिसिबीएल बैंक व द्वःछि व ग्वीखुगू कारोबार याःगु लिधंसाय् भिवोर विकास बैंक दकलय् न्ह्यःने लाःगु दु ।
