अन्तिम ई तक सहमतिया कुतः जुइ : प्रचण्ड
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' राजनीतिक गतिरोध अन्त्या निंतिं अन्तिम ई तक सहमतिया कुतः यानाच्वनीगु खँ धयादीगु दु ।
आइतवाः पार्टी मू ज्याकू पेरिसडाँडाय् जूगु माओवादीया अनौपचारिक बैठक लिपा संचारकर्मीत नाप खँल्हाबंला यानादिसें वयेकलं सहमतिया निंतिं दलत नाप सहलह जुयाच्वंगु धयादिसें माओवादीं सहमतिया निंतिं मंसिर ५ गते तक हे दलत नाप सहलह व संवाद जारी यायेगु खँ धयादिल ।
माओवादीं थ्वस्वयां न्ह्यः सरकारयात मंसिर ५ गते तक सहमति यायेत अल्टिमेटम ब्यूगु खः । माओवादीं उगु ई तक नं सहमति मजूसाः आमहडताल सहितया ज्याझ्वः दुथ्याःगु स्वक्वगू आन्दोलनय् कुहांवयेगु ख्याच्वः ब्यूगु खः ।
उखे आइतवाः नेपालगंजय् पत्रकारत नाप खँल्हाबंला यानादिसें माओवादीया स्थायी कमिटी दुजः नेत्रविक्रम चन्द विप्लवं राष्ट्रिय सरकारया नेतृत्व माओवादीयात याये ब्यूसाः जारी आन्दोलन दिकेगु खँ धयादीगु दु । वयेकलं दकलय् तःधंगू दल माओवादीं अज्याःगु सरकारया नेतृत्व याःसा नागरिक सर्वोच्चता कायम जुइगु धयादिल ।
