प्रचण्ड व ल्यानग्रेन दथुइ खँल्हाबंला
एकीकृत नेकपा (माओवादी)या अध्यक्ष पुष्पकमल दाहाल 'प्रचण्ड' व राष्ट्रसंघीय नियोग अनमिनया प्रमुख करिन ल्यानग्रेन दथुइ आइतवाः खँल्हाबंला जूगु दु ।
न्हूबजारय् च्वंगु प्रचण्डया छेँय् जूगु खँल्हाबंलाय् शान्ति प्रकृया, संविधान निर्माण नापं वर्तमान गतिरोधया बारे खँल्हाबंला जूगु खः । ल्यानग्रेनं राष्ट्रसंघया सुरक्षा परिषदय् जूगु बैठकया बारे प्रचण्डयात जानकारी बियादीगु खः ।
अथेहे सुरक्षा परिषदया बैठकय् राष्ट्रसंघया महासचिव बान कि मुनं नेपाः सम्बन्धि प्रतिवेदनय् राष्ट्रिय सहमतिया सरकारया आवश्यकता जूगु खँ न्ह्यथंनातःगु बारे सत्ता गठबन्धन दलतय्सं याःगु विरोध बारे नं खँल्हाबंला जूगु खः । खँल्हाबंला लिपाः माओवादी अध्यक्ष प्रचण्डं महासचिव बानया अभिव्यक्ति सकारात्मक जूगु कनादिल ।
खँल्हाबंलाय् अनमिन प्रमुख ल्यानग्रेनं वर्तमान राजनीतिक गतिरोध याकनं ज्यंकेत इनाप यानादीगु खःसा लिसलय् माओवादी अध्यक्षं सहमतिया निंतिं कुतः जुयाच्वंगु व याकनं हे सहमति जुइगु धयादिल । अथेहे वयेकलं पत्रकारत नाप खँल्हाबंला यानादिसें सहमति याकनं हे जुइगु विश्वास प्वंकादीगु खः ।
