'संसद पाखें हे समस्या समाधान'
राष्ट्रपति डा. रामवरण यादवं दक्वं समस्यायात ससंदपाखें हे समाधान यायेमाःगु खँ धयादीगु दु ।
सप्तरीया छिन्नमस्ता भगवतीया दर्शन यायेत शनिवाः सुथय् सखडा थ्यंकादिम्ह राष्ट्रपति यादवं पत्रकारत नाप खँल्हाबंला यानादिसें जनआन्दोलन पाखें प्राप्त उपलब्धियात संस्थागत यायेमाःगु धयादिल । लोकतन्त्रया स्थायित्व, स्थायी शान्तिया कामना व देय्या दक्वं समस्या समाधान जुइमाः धकाः थःम्हं छिन्नमस्ता भगवतीनाप कामना यानागु खँ वयेकलं कनादिल ।
वयेकलं थः लोकतान्त्रिक पृष्ठभुमिं वयागुलिं लोकतन्त्रया हरण मजुइमाः धकाः सचेत जूगु धयादिसें खुइदँया लोकतन्त्रया आन्दोलन पाखें प्राप्त उपलब्धियात संस्थागत यायेमाःगु थुगु ईलय् देय्या दक्वं पक्षय् छप्पँ जुइमाःगु खँय् बः बियादिल ।
अथेहे वयेकलं अन स्थानीय राजनीतिक दल, व्यापारी, अधिकारकर्मी व बुद्धिजीवीत नाप सहलह यानादीगु खः । उगु ईलय् वयेकलं ईलय् हे संविधान निर्माण जुइमाःगु खँ बः बियादीगु खः । अथेहे सहलहलय् ब्वति काःपिंसं राष्ट्रपति यादवयात छिन्नमस्ता भगवती क्षेत्रया विकास, सतक निर्माण व राजविराज विमानस्थल संचालनया निंतिं इनाप याःगु खः ।
राष्ट्रपति अन वइगु जूगिलं शनिवाः अनया सुरक्षा व्यवस्था अत्यन्त कडा याःगु खः ।
