प्रचण्ड व बिजुक्छे दथुइ खँल्हाबंला
एकीकृत नेकपा (माओवादी)या अध्यक्ष पुष्पकमल दाहाल 'प्रचण्ड' व नेपाल मजदुर किसान पार्टीया अध्यक्ष नारायणमान बिजुक्छे दथुइ खँल्हाबंला जूगु दु ।
शनिवाः न्हिनय् निताः ईलय् बिजुक्छेया ख्वपःय् च्वंगु छेँय् जूगु खँल्हाबंलाय् माओवादीया आन्दोलन, राजनीति गतिरोध, राष्ट्रपतिया पलाः, शान्ति प्रकृया, राज्य पुनसंरचना, संघीयता आदि विषयलय् खँल्हाबंला जूगु खः ।
खँल्हाबंलाय् माओवादी अध्यक्ष प्रचण्डं माओवादीया जारी आन्दोलनयात ग्वाहालि यायेत इनाप यानादीगु खः । खँल्हाबंला लिपाः प्रचण्डं धयादिल, - 'वयेकया छुं माग त दु, उकीयात सम्बोधन यायेधुंकाः झीगू आन्दोलनयात ग्वाहालि यायेत बिजुक्छेजी सकारात्मक दी ।'
छुं ई न्ह्यः जक नमकिपाया अध्यक्ष बिजुक्छें संविधानसभा विघटन याना: राष्ट्रपति शासन लागू याये मा:गु व आमनिर्वाचन यायेमाः धकाः न्ववानादीगु खः । बिजुक्छें उगु विषलय् नं खँल्हाबंला जूगु कनादिल - 'जिं संसद विघटन यायेमाः धइगु खः, संविधान विघटन मखु । थुकीया बारे प्रचण्डजीयात भ्रम लागूलिं उकी बारे नं खँल्हाबंला जुल ।'
