माओवादी पाखें सरकरायात मंसिर ५ गते तकया अल्टिमेटम
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' नागरिक सर्वोच्चता कायम यायेत सरकारयात मंसिर ५ गते तकया अल्टिमेटम ब्यूगु दु । वयेकलं उगु ईलय् तक नं नागरिक सर्वोच्चता कायम मजुसाः स्वंगू चरणया आन्दोलन यायेगु व उगु आन्दोलन थ्वस्वां कडा व व्यापक जुइगु ख्याच्वः बियादिल ।
निक्वःगू चरणया आन्दोलन कथं लिप्पांगु न्हि सिंहदरवार घेराउ यायेगु ज्याझ्वः लिपाः प्रदर्शनीमार्गय् याःगु जनासभायात सम्बोधन यानादिसें वयेकलं आः सिंहदरवारय् च्वनाच्वंपिं रिमोट कन्ट्रोल व आकाशवाणीं अन थ्यंगु धयादिसें उमिसं माओवादीयात हानं जंगल छ्वयेगु कुताः यानच्वंगु द्वपं बियादिल । वयेकलं थ्व सरकारयात जनसमर्थन मदुगु व उमिसं छु चाहे जुल माओवादीं उकीया विपरीत ज्या यायेगु धयादिल ।
आः संविधानसभा भंग यायेगु व संघीयता विरुद्ध षड्यन्त्र जुयाच्वंगु धयादिसें माओवादी अध्यक्ष प्रचण्डं नागरिक सर्वोच्चा पलिस्था मजूतल्ले माओवादीया आन्दोलन मदीगु धयादिल । वयेकलं राणाकालीन व जुजुतय्गु पालय् जूगु असमान सन्धित खारेज जुइमाःगु धासें आः गणतन्त्र नेपाःया जनाताया इच्छा कथं न्हूगु सन्धि जुइमाःगु खँय् बः बियादिल । वयेकलं माओवादीं छिमेकी देय्त नाप बांलागू स्वापू चाहे जूगु नं धयादिल ।
माओवादीया निक्वःगु आन्दोलन सफल जूगु दाबी यानादिसें प्रचण्डं लखौं जनता सतकय् वःगु खनाः कांग्रेस व एमालेया नेता ग्याःगु दाबी यानादिल । वयेकलं माओवादीं याःगु आन्दोलनय् लखौं जनतां ब्वति कया: नं थुगु आन्दोलन तसकं शान्तिपूर्ण जूगुलिं थीथी कूटनीतिज्ञतय्सं थःत बधाइ ब्यूगु धयादिल ।
अथेहे सभायात सम्बोधन यानादिसें माओवादी उपाध्यक्ष नापं माओवादीपाखें गठित संयुक्त राष्ट्रिय जनआन्दोलन समिति नेपालया संयोजक डा. बाबुराम भट्टराईं नेपाली जनता थःगु भाग्य थःम्हं हे च्वये चाहे जूगु धयादिसें जनतया आन्दोलनयात स्यंकेत स्वइपिं सुयातं मत्वःतिगु धयादिल ।
अदृश्य शक्तिं राष्ट्रपतियात ज्ञानेन्द्रया शैलीइ 'कु' यायेत ल्ह्वनाच्वंगु दाबी यानादिसें वयेकलं थःपिंसं जनताया बाहेक मेपिनिगु आदेश पालना मयायेगु धयादिल । वयेकलं थ्वहे संसदं राष्ट्रपतिया ल्यःगु धयादिसें राष्ट्रपतिया विषयलय् थ्वहे संसदय् सहलह याये दयेमाः धयादिल ।
वयेकलं नागरिक सर्वोच्चता धाइगु जनताया अधीनय् जुइगु धयादिसें नेपाली जनता हे सर्वोपरि जूगुलिं नेपाःया आन्तरिक मामिलाय् सुयांगु हस्तक्षेप सह्य मजूगु धयादिल । वयेकलं थःपिंसं जवः ल्हा ल्वनाःगु विकल्प सरकारं मन्यंसाः देपाः ल्हा चलेयायेत बाध्य जुइगु धयादिल । वयेकलं देपाः ल्हा धइगु क्रान्तिया ल्हा जूगुलिं उकीं सुयातं बाँकी मतइगु ख्याच्व: बियादिल ।
