माओवादीया निक्वःगु चरणया आन्दोलन क्वचाल
निन्हुया न्हि नं सिंहदरवार घेराउ
राष्ट्रपति डा. रामवरण यादवं निर्वाचित सरकारया निर्णय विरुद्ध ल्ह्वंगु पलाः व नागरिक सर्वोच्चताया माग यासें आन्दोलन यानाच्वंगु एकीकृत नेकपा (माओवादी)या निक्वःगु चरणया आन्दोलन शुक्रवाः क्वचाःगु दु । निक्वःगु चरणया आन्दोलनया लिप्पांगु ज्याझ्वः कथं निन्हुया न्हि शुक्रवाः नं सिंहदरवार घेराउ याःगु खःसा वयां लिपा छगू जनसभा यासें निक्वःगु चरणया आन्दोलन क्वचायेकूगु खः ।
माओवादीया द्वलंद्व नेतात व कार्यकर्तातय्सं शुक्रवाः नं सुथय् च्याताः ईलं निसें देय्या प्रमुख प्रशासनिक ज्याकू सिंहदरवार घेराउ याःगु खः । म्हिगः थें थौं नं माओवादीं च्यागू थीथी थासं घेराउ ज्याझ्वः याःगु खः । माओवादी शीर्ष नेतातय् नेतृत्वय् भद्रकाली, माइतीघर मण्डाला, पद्मोदय मोड, सिडियो ज्याकू, सतक विभाग, हनुमानस्थान, अनामनगर घट्टेकुलो व कालिकास्थान बाँसघारीं घेराउ याःगु खः ।
शुक्रवाःया घेराउ ज्याझ्वः म्हिगःया तुलनायय् संयमित खनेदुगु खःसा सुरक्षाकर्मीत नं म्हिगया तुलनाय् अप्वः परिचालन याःगु खः । म्हिगः नेपाल प्रहरीं न्हापांगु घेरा दयेकाः सुरक्षा व्यवस्था याःगु खःसा थौं धाःसा सशस्त्र प्रहरीया न्हापांगु घेरा व वयां लिपा तिनी जनपद प्रहरीया घेरा परिचालन याःगु खः ।
सुथय् च्याताः ईलं निसें निताः ई तक घेराउ ज्याझ्वः यायेधुंकाः च्यागूलिं थासय् च्वनाच्वंपिं प्रदर्शनकारीतय्सं जुलुस पिकाया प्रदर्शनमार्ग थ्यंकाः जनसभाय् हिउगु खः ।
सभायात माओवादी अध्यक्ष पुष्पकमल दाहाल 'प्रचण्ड', माओवादीं पाखें गठित संयुक्त जनआन्दोलन समिति नेपालया संयोजक व माओवादीया उपाध्यक्ष डा. बाबुराम भट्टराई लगायत नेतातय्सं संवोधन याःगु खः ।
सभाय् माओवादीं सरकारयात मंसिर ५ गते तक सहमति वयेत अल्टिमेटम ब्यूगु दुसाः उगु ई तक नं सहमतिलय् मवसाः स्वंगू चरण यायेगु ख्याच्वः ब्यूगु दु ।
