माओवादीयात वार्ताय् वयेत कोइरालाया इनाप
उसाँय् मदुम्ह नेपाली कांग्रेसया सभापित गिरिजाप्रसाद कोइरालां आन्दोलनरत एनेकपा (माओवादी)यात आन्दोलन त्वःता वार्ताय् वयेत इनाप यानादीगु दु ।
शहिद गंगालाल हृदय केन्द्रय् वासः वकाच्वंगु थासय् हे पत्रकारत नाप खँल्हाबंला यानादिसें वयेकलं विपीया सिद्धान्त कथं थःम्हं माओवादीयात थौं थन तक हयाःगु धयादिसें सहमतिया निंतिं माओवादीयात वार्ताय् वयेत इनाप यानादिल ।
वयेकलं दक्वं समस्या समाधान उच्चस्तरीय राजनीतिक संयन्त्र मार्फत जुइगु धयादिल । वयेकलं थंज्याःगु संयन्त्र निर्माण यायेत दक्वं पक्ष तयार जुसां थः उसाँय् मदुगुलिं लिबाःगु धयादिल । कोइरालां संसारय् समाधान यायेमफइगु खँ छुं मदुगु धयादिसें वर्तमान राजनीतिक समस्या नं याकनं समाधान जुइगु विश्वास प्वंकादिल ।
थःगु स्वास्थ्य अवस्था बांलाना वःगु धयादिसें कांग्रेस सभापति कोइरालां थप उपचारया निंतिं कन्हय् सिंगापुर वनेत्यनाःगु खँ कनादिल । वयेक कन्हय् सुथय् न्ह्यताः ईलय् थप वासः याकेत सिंगापुर झायादित्यंगु दु ।
